PSALMI IUXTA LXX 73

Ut quid Deus reppulisti in finem

iratus est furor tuus super oves pascuae tuae

₂memor esto congregationis tuae quam possedisti ab initio

redemisti virgam hereditatis tuae

mons Sion in quo habitasti in eo

₃leva manus tuas in superbias eorum in finem

quanta malignatus est inimicus in sancto

₄et gloriati sunt qui oderunt te in medio sollemnitatis tuae

posuerunt signa sua signa

₅et non cognoverunt

sicut in exitu super summum

quasi in silva lignorum securibus

₆exciderunt ianuas eius in id ipsum

in securi et ascia deiecerunt ÷eam:

₇incenderunt igni sanctuarium tuum

in terra polluerunt tabernaculum nominis tui

₈dixerunt in corde suo cognatio eorum simul

quiescere faciamus omnes dies festos Dei a terra

₉signa nostra non vidimus

iam non est propheta et nos non cognoscet amplius

₁₀usquequo Deus inproperabit inimicus

inritat adversarius nomen tuum in finem

₁₁ut quid avertis manum tuam

et dexteram tuam de medio sinu tuo in finem

₁₂Deus autem rex noster ante saeculum

operatus est salutes in medio terrae

₁₃tu confirmasti in virtute tua mare

contribulasti capita draconum in aquis

₁₄tu confregisti capita draconis

dedisti eum escam populis Aethiopum

₁₅tu disrupisti fontem et torrentes

※tu siccasti fluvios Aetham:

₁₆tuus est dies et tua est nox tu fabricatus es auroram et solem

₁₇tu fecisti omnes terminos terrae

aestatem et ver tu plasmasti ea

₁₈memor esto huius inimicus inproperavit Dominum

et populus insipiens incitavit nomen tuum

₁₉ne tradas bestiis animam confitentem tibi

animas pauperum tuorum ne obliviscaris in finem

₂₀respice in testamentum tuum

quia repleti sunt qui obscurati sunt terrae domibus iniquitatum

₂₁ne avertatur humilis factus confusus

pauper et inops laudabunt nomen tuum

₂₂exsurge Deus iudica causam tuam

memor esto inproperiorum tuorum

eorum qui ab insipiente sunt tota die

₂₃ne obliviscaris voces inimicorum tuorum

superbia eorum qui te oderunt ascendit semper