PSALMI IUXTA LXX 74

₂Confitebimur tibi Deus confitebimur et invocabimus nomen tuum

narrabimus mirabilia tua

₃cum accepero tempus ego iustitias iudicabo

₄liquefacta est terra et omnes qui habitant in ea

ego confirmavi columnas eius diapsalma

₅dixi iniquis nolite inique facere

et delinquentibus nolite exaltare cornu

₆nolite extollere in altum cornu vestrum

nolite loqui adversus Deum iniquitatem

₇quia neque ab oriente neque ab occidente

neque a desertis montibus

₈quoniam Deus iudex est hunc humiliat et hunc exaltat

₉quia calix in manu Domini vini meri plenus mixto

et inclinavit ex hoc in hoc

verum fex eius non est exinanita

bibent omnes peccatores terrae

₁₀ego autem adnuntiabo in saeculum

cantabo Deo Iacob

₁₁et omnia cornua peccatorum confringam

et exaltabuntur cornua iusti