PSALMI IUXTA LXX 110

Confitebor tibi Domine in toto corde meo

in consilio iustorum et congregatione

₂magna opera Domini exquisita in omnes voluntates eius

₃confessio et magnificentia opus eius

et iustitia eius manet in saeculum saeculi

₄memoriam fecit mirabilium suorum

misericors et miserator Dominus

₅escam dedit timentibus se

memor erit in saeculum testamenti sui

₆virtutem operum suorum adnuntiabit populo suo

₇ut det illis hereditatem gentium

opera manuum eius veritas et iudicium

₈fidelia omnia mandata eius confirmata in saeculum saeculi

facta in veritate et aequitate

₉redemptionem misit populo suo

mandavit in aeternum testamentum suum

sanctum et terribile nomen eius

₁₀initium sapientiae timor Domini

intellectus bonus omnibus facientibus eum

laudatio eius manet in saeculum ÷saeculi: