PSALMI IUXTA LXX 111

Beatus vir qui timet Dominum in mandatis eius volet nimis

₂potens in terra erit semen eius generatio rectorum benedicetur

₃gloria et divitiae in domo eius

et iustitia eius manet in saeculum saeculi

₄exortum est in tenebris lumen rectis

misericors et miserator et iustus

₅iucundus homo qui miseretur et commodat

disponet sermones suos in iudicio

₆quia in aeternum non commovebitur

₇in memoria aeterna erit iustus ab auditione mala non timebit

paratum cor eius sperare in Domino

₈confirmatum est cor eius non commovebitur

donec dispiciat inimicos suos

₉dispersit dedit pauperibus

iustitia eius manet in saeculum saeculi

cornu eius exaltabitur in gloria

₁₀peccator videbit et irascetur

dentibus suis fremet et tabescet

desiderium peccatorum peribit