SOFONIAS PROPHETA 1

₁Verbum Domini quod factum est ad Sofoniam filium Chusi

filium Godoliae filii Amariae filii Ezechiae

in diebus Iosiae filii Amon regis Iuda

₂congregans congregabo omnia a facie terrae dicit Dominus

₃congregans hominem et pecus

congregans volatile caeli et pisces maris

et ruinae impiorum erunt

et disperdam homines a facie terrae dicit Dominus

₄et extendam manum meam super Iudam

et super omnes habitantes Hierusalem

et disperdam de loco hoc reliquias Baal

et nomina aedituorum cum sacerdotibus

₅et eos qui adorant super tecta militiam caeli

et adorant et iurant in Domino et iurant in Melchom

₆et qui avertuntur de post tergum Domini

et qui non quaesierunt Dominum nec investigaverunt eum

₇silete a facie Domini Dei quia iuxta est dies Domini

quia praeparavit Dominus hostiam sanctificavit vocatos suos

₈et erit in die hostiae Domini visitabo super principes

et super filios regis et super omnes qui induti sunt veste peregrina

₉et visitabo omnem

qui arroganter ingreditur super limen in die illa

qui conplent domum Domini Dei sui iniquitate et dolo

₁₀et erit in die illa dicit Dominus vox clamoris a porta Piscium

et ululatus a secunda et contritio magna a collibus

₁₁ululate habitatores pilae conticuit omnis populus Chanaan

disperierunt omnes involuti argento

₁₂et erit in tempore illo scrutabor Hierusalem in lucernis

et visitabo super viros defixos in fecibus suis

qui dicunt in cordibus suis

non faciet bene Dominus et non faciet male

₁₃et erit fortitudo eorum in direptionem

et domus eorum in desertum

et aedificabunt domos et non habitabunt

et plantabunt vineas et non bibent vinum earum

₁₄iuxta est dies Domini magnus iuxta et velox nimis

vox diei Domini amara tribulabitur ibi fortis

₁₅dies irae dies illa dies tribulationis et angustiae

dies calamitatis et miseriae dies tenebrarum et caliginis

dies nebulae et turbinis

₁₆dies tubae et clangoris

super civitates munitas et super angulos excelsos

₁₇et tribulabo homines et ambulabunt ut caeci

quia Domino peccaverunt

et effundetur sanguis eorum sicut humus

et corpus eorum sicut stercora

₁₈sed et argentum eorum et aurum eorum non poterit liberare eos

in die irae Domini

in igne zeli eius devorabitur omnis terra

quia consummationem cum festinatione faciet

cunctis habitantibus terram