LIBER SAPIENTIAE 8

₁adtingit enim a fine usque ad finem

fortiter

et disponit omnia suaviter

₂hanc amavi et exquisivi a iuventute mea

et quaesivi sponsam mihi adsumere

et amator factus sum formae illius

₃generositatem glorificat contubernium habens Dei

sed et omnium Dominus dilexit illam

₄doctrix est enim disciplinae Dei et electrix operum

illius

₅et si divitiae appetuntur in vita

quid sapientiae locupletius quae omnia operatur

₆si autem sensus operatur

quis horum quae sunt magis quam illa est artifex

₇et si iustitiam quis diligit

labores huius magnas habent virtutes

sobrietatem enim et sapientiam docet

et iustitiam et virtutem quibus utilius nihil est in vita hominibus

₈et si multitudinem

scientiae desiderat quis

scit praeterita et de futuris aestimat

scit versutias sermonum et dissolutiones

argumentorum

signa et monstra scit antequam fiant

et eventus temporum et saeculorum

₉proposui ergo hanc adducere mihi ad convivendum

sciens quoniam communicabit mecum de bonis

et erit adlocutio cogitationis et taedii mei

₁₀habebo propter hanc claritatem ad turbas

et honorem apud seniores iuvenis

₁₁acutus inveniar in iudicio

et in conspectu potentium admirabilis ero

et facies principum mirabuntur me

₁₂tacentem me sustinebunt et loquentem me respicient

et sermocinante plura

manus ori suo inponent

₁₃propterea habebo per hanc inmortalitatem

et memoriam aeternam his qui post me futuri sunt relinquam

₁₄disponam populos et nationes mihi erunt subiectae

₁₅timebunt me audientes reges horrendi

in multitudine videbor bonus et in bello fortis

₁₆intrans in domum meam conquiescam cum illa

non enim habet amaritudinem conversatio illius

nec taedium convictus ipsius sed laetitiam et gaudium

₁₇haec cogitans apud me et commemorans in corde meo

quoniam inmortalitas est in cogitatione sapientiae

₁₈et in amicitia illius delectatio bona

et in operibus manuum illius honestas sine defectione

et in certamine loquellae illius sapientia

et praeclaritas in communicatione sermonum ipsius

circuibam quaerens ut mihi illam adsumerem

₁₉puer autem eram ingeniosus et sortitus sum animam bonam

₂₀et cum essem magis bonus veni ad corpus incoinquinatum

₂₁et ut scivi quoniam aliter non possum esse continens nisi

Deus det

et hoc ipsum erat sapientiae scire cuius esset hoc donum

adii Dominum et deprecatus sum illum

et dixi ex totis praecordiis meis