LIBER SAPIENTIAE 7

₁sum quidem et ego mortalis homo similis omnibus

et ex genere terreno illius qui prior finctus

est

et in ventre matris figuratus sum caro

₂decem mensuum tempore coagulatus in sanguine

ex semine hominis et delectamento somni conveniente

₃et ego natus accepi communem aerem

et in similiter factam

decidi terram

primam vocem similem omnibus emisi plorans

₄in involumentis nutritus sum et curis magnis

₅nemo enim ex regibus aliud habuit nativitatis initium

₆unus ergo introitus est omnibus ad vitam et

similis exitus

₇propter hoc optavi et datus est mihi sensus

et invocavi et venit in me spiritus sapientiae

₈et praeposui illam regnis et sedibus

et divitias nihil esse duxi in conparatione illius

₉nec conparavi illi lapidem pretiosum

quoniam omne aurum in conparatione illius harena est exigua

et tamquam lutum aestimabitur argentum in conspectu illius

₁₀super salutem et speciem dilexi illam

et proposui pro luce habere illam

quoniam inextinguibile est lumen illius

₁₁venerunt autem mihi omnia bona pariter cum illa

et innumerabilis honestas per manus illius

₁₂et laetatus sum in omnibus

quoniam antecedebat ista sapientia

et ignorabam quoniam horum omnium mater est

₁₃quam sine fictione didici et sine invidia communico

et honestatem illius non abscondo

₁₄infinitus enim thesaurus est hominibus

quod qui usi sunt participes facti sunt

amicitiae Dei

propter disciplinae dona commendati

₁₅mihi autem det Deus dicere ex sententia

et praesumere digna horum quae

dantur

quoniam ipse et sapientiae dux est

et sapientium emendator

₁₆in manu enim illius et nos et sermones nostri

et omnis sapientia et operum scientiae

disciplina

₁₇ipse enim mihi dedit horum quae sunt scientiam veram

ut sciam dispositionem orbis terrarum et virtutes elementorum

₁₈initium et consummationem et medietatem temporum

et meditationem omnium

morum mutationes et divisiones temporum

₁₉anni cursus et stellarum dispositiones

₂₀naturas animalium et iras bestiarum

vim ventorum et cogitationes hominum

differentias arborum et virtutes radicum

₂₁et quaecumque sunt absconsa et inprovisa didici

omnium enim artifex docuit me sapientia

₂₂est enim in illa spiritus intellectus

sanctus unicus multiplex

subtilis mobilis dissertus incoinquinatus

certus suavis amans bonum acutus

qui nihil vetat benefacere

₂₃humanus stabilis

certus securus

omnem habens virtutem omnia prospiciens

et qui capiat omnes spiritus intellegibiles mundos subtiles

₂₄omnibus enim mobilibus mobilior est sapientia

adtingit autem ubique

et capit propter suam munditiam

₂₅vapor est enim virtutis Dei

et emanatio quaedam est claritatis omnipotentis

Dei sincera

et ideo nihil inquinatum in illa incurrit

₂₆candor est enim lucis aeternae

et speculum sine macula Dei maiestatis

et imago bonitatis illius

₂₇et cum sit una omnia potest

et permanens in se omnia innovat

et per nationes in animas sanctas se transfert

amicos Dei et prophetas constituit

₂₈neminem enim diligit Deus

nisi eum qui cum sapientia inhabitat

₂₉est enim haec speciosior sole

et super omnem stellarum dispositionem

luci conparata invenitur prior

₃₀illi enim succedit nox sapientiam autem non vincit malitia