LIBER SAPIENTIAE 6

₁melior est sapientia quam vires

et vir prudens magis quam fortis

₂audite ergo reges et intellegite discite iudices finium terrae

₃praebete aures vos qui continetis multitudines

et placetis vobis in turbis nationum

₄quoniam data est a Domino potestas vobis et virtus ab Altissimo

qui interrogabit opera vestra et cogitationes scrutabitur

₅quoniam cum essetis ministri regni illius non recte iudicastis

neque custodistis legem iustitiae

neque secundum voluntatem Dei ambulastis

₆horrende et cito apparebit vobis

quoniam iudicium durissimum in his qui praesunt fiet

₇exiguo enim conceditur misericordia

potentes autem potenter tormenta patientur

₈non enim subtrahet personam cuiusquam Dominus

nec reverebitur magnitudinem cuiusquam

quoniam pusillum et magnum ipse fecit

et aequaliter cura est illi pro omnibus

₉fortioribus autem fortior instat cruciatio

₁₀ad vos ergo reges sunt hi sermones mei

ut discatis sapientiam et non excidatis

₁₁qui enim custodierint iusta iuste

iustificabuntur

et qui didicerint ista invenient quid

respondeant

₁₂concupiscite ergo sermones meos

diligite illos et habebitis disciplinam

₁₃clara est et quae numquam marcescat sapientia

et facile videtur ab his qui diligunt eam

et invenietur ab his qui quaerunt illam

₁₄praeoccupat qui se concupiscunt ut illis se prior ostendat

₁₅qui de luce vigilaverit ad illam non laborabit

adsidentem enim illam foribus suis inveniet

₁₆cogitare ergo de illa sensus est consummatus

et qui vigilaverit propter illam cito erit securus

₁₇quoniam dignos se ipsa circuit quaerens

et in viis ostendit se illis hilariter

et in omni providentia occurrit illis

₁₈initium enim illius verissima est disciplinae concupiscentia

₁₉cura ergo disciplinae dilectio est

et dilectio custoditio legum illius est

custoditio autem legum consummatio incorruptionis est

₂₀incorruptio autem facit esse proximum Deo

₂₁concupiscentia itaque sapientiae deducet ad regnum

perpetuum

₂₂si ergo delectamini sedibus et

stemmatibus

reges populi

diligite sapientiam ut in perpetuum regnetis

₂₄quid est autem sapientia et quemadmodum facta sit referam

et non abscondam a vobis sacramenta Dei

sed ab initio nativitatis investigabo

et ponam in lucem scientiam illius

et non praeteribo veritatem

₂₅neque cum invidia tabescente iter habebo

quoniam ista non erit particeps sapientiae

₂₆multitudo autem sapientium sanitas est orbis

terrarum

et rex sapiens populi stabilimentum est

₂₇ergo accipite disciplinam per sermones meos et proderit vobis