LIBER SAPIENTIAE 5

₁tunc stabunt iusti in magna constantia

adversus eos qui se angustaverunt

et qui abstulerunt labores illorum

₂videntes turbabuntur timore horribili

et mirabuntur in subitatione insperatae

salutis

₃dicent inter se paenitentiam agentes

et per angustiam spiritus gementes

hi sunt quos habuimus aliquando in risu

et in similitudine inproperii

₄nos insensati vitam illorum aestimabamus insaniam

et finem illorum sine honore

₅quomodo conputati sunt inter filios Dei

et inter sanctos sors illorum est

₆ergo erravimus a via veritatis

et iustitiae lumen non luxit nobis

et sol non est ortus nobis

₇lassati sumus in via iniquitatis et perditionis

et ambulavimus vias difficiles

viam autem Domini ignoravimus

₈quid nobis profuit superbia

aut quid divitiarum iactatio

contulit nobis

₉transierunt omnia illa tamquam umbra

et tamquam nuntius percurrens

₁₀et tamquam navis quae pertransit fluctuantem

aquam

cuius cum praeterierit non est vestigium invenire

neque semitam carinae illius in fluctibus

₁₁aut avis quae transvolat in

aere

nullum invenitur argumentum itineris illius

sed tantum sonitus est alarum verberans levem

ventum

et scindens per vim itineris aerem

commotis alis transvolavit

et post hoc nullum signum invenitur itineris illius

₁₂aut tamquam sagittae emissae in locum destinatum

divisus aer continuo in se reclusus est

ut ignoretur transitus illius

₁₃sic et nos nati continuo desivimus esse

et virtutis quidem signum nullum valuimus ostendere

in malignitate autem nostra consumpti sumus

₁₄talia dixerunt et

peccaverunt

₁₅quoniam spes impii tamquam lanugo est quae a vento tollitur

et tamquam spuma gracilis quae a procella dispergitur

et tamquam fumus qui a vento diffusus est

et tamquam memoria hospitis unius diei praetereuntis

₁₆iusti autem in perpetuum vivent

et apud Dominum est merces eorum

et cogitatio illorum apud Altissimum

₁₇ideo accipient regnum decoris et diadema speciei de manu Domini

quoniam dextera sua teget eos

et brachio suo defendet illos

₁₈accipiet armaturam zelus illius

et armabit creaturam ad ultionem inimicorum

₁₉induet pro torace iustitiam

et accipiet pro galea iudicium certum

₂₀sumet scutum inexpugnabilem aequitatem

₂₁acuet autem duram iram in lanceam

et pugnabit cum illo orbis terrarum contra insensatos

₂₂ibunt directae emissiones fulgorum

et tamquam a bene curvato arcu nubium exterminabuntur

et ad certum locum insilient

₂₃et a petrosa ira plenae mittentur grandines

et scandescet in illos aqua maris

et flumina concurrent duriter

₂₄contra illos stabit spiritus virtutis

et tamquam turbedo venti dividet illos

et ad heremiam perducet omnem terram iniquitatis

et malignitas evertet sedes potentium