LIBER SAPIENTIAE 4

₁melior est generatio

cum claritate

inmortalitas est enim in memoria illius

quoniam et apud Deum nota est et apud homines

₂cum praesens est imitantur illam

et desiderant eam cum se duxerit

et in perpetuum coronata triumphat

incoinquinatorum certaminum praemium vincens

₃multigena autem impiorum multitudo non erit utilis

et spuria vitulamina non dabunt radices altas

nec stabile firmamentum conlocabunt

₄et si in ramis in tempore germinaverint

infirmiter posita a vento commovebuntur

et a nimietate ventorum eradicabuntur

₅confringentur rami inconsummati

et fructus illorum inutilis

et acerbi ad manducandum et ad nihilum apti

₆ex iniquis enim omnes filii qui nascuntur

testes sunt nequitiae adversus parentes in interrogatione sua

₇iustus autem si morte praeoccupatus fuerit in refrigerio

erit

₈senectus enim venerabilis est non diuturna

neque numero annorum conputata

cani sunt autem sensus hominibus

₉et aetas senectutis vita inmaculata

₁₀placens Deo factus dilectus

et vivens inter peccatores translatus est

₁₁raptus est ne malitia mutaret intellectum illius

aut fictio

decipiat animam illius

₁₂fascinatio enim nugacitatis obscurat bona

et inconstantia concupiscentiae transvertit sensum

sine malitia

₁₃consummatus in brevi explevit tempora multa

₁₄placita enim erat Deo anima illius

propter hoc properavit educere illum de medio iniquitatum

populi autem videntes et non intellegentes

nec ponentes in praecordiis talia

₁₅quoniam gratia Dei et misericordia in

sanctos illius

et respectus in electos illius

₁₆condemnat autem iustus mortuus vivos impios

et iuventus celerius consummata longam vitam

iniusti

₁₇videbunt enim finem sapientis

et non intellegent quid cogitaverit de illo Deus

et quare munierit illum Dominus

₁₈videbunt enim et contemnent

illos autem Dominus inridebit

₁₉et erunt post haec decidentes sine honore

et in contumelia inter mortuos in perpetuum

quoniam disrumpet illos inflatos sine voce

et commovebit illos a fundamentis

et usque ad supremum desolabuntur

et erunt gementes et memoria illorum periet

₂₀venient in cogitatione peccatorum suorum timidi

et traducent illos ex adverso iniquitates

ipsorum