LIBER SAPIENTIAE 19

₁impiis autem usque in novissimum sine misericordia ira supervenit

praesciebat enim et futura illorum

₂quoniam ipsi cum reversi essent ut se ducerent

et cum magna sollicitudine praemisissent illos

consequebantur illos paenitentia

acti

₃adhuc enim inter manus habentes luctus

et deplorantes ad monumenta mortuorum

aliam sibi adsumpserunt cogitationem inscientiae

et quos rogantes proiecerunt

hos tamquam fugitivos persequebantur

₄ducebat enim illos ad hunc finem digna necessitas

et horum quae acciderant memorationem amittebant

ut eam quae deerat tormentis

replerent punitionem

₅et populus quidem tuus mirabiliter transiret

illi autem novam mortem invenirent

₆omnis enim creatura ad suum genus ab initio

refigurabatur

deserviens tuis praeceptis ut pueri tui custodirentur inlaesi

₇nam nubis castra eorum adumbrabat

et ex aqua quae ante erat terra arida apparuit

et ex mari Rubro via sine inpedimento

et campus germinans de profundo nimio

₈per quem omnis natio transivit quae tegebatur tua manu

videntes mirabilia monstra

₉tamquam equi enim depaverunt

et tamquam agni exultaverunt

magnificantes te Domine qui liberasti illos

₁₀memores enim erant adhuc eorum

quae in incolatu illorum facta fuerant

quemadmodum pro natione animalium eduxit terra muscas

et pro piscibus eructavit fluvius multitudinem ranarum

₁₁novissime autem viderunt novam creaturam avium

cum abducti concupiscentia

postulaverunt escam epulationis

₁₂in adlocutione enim desiderii

ascendit illis de mari ortygometra

et vexationes peccatoribus supervenerunt

non sine illis quae ante facta erant argumentis per vim fluminum

iuste enim patiebantur secundum suas nequitias

₁₃etenim detestabiliorem inhospitalitatem instituerunt

alii quidem ignotos non recipiebant advenas

alii autem bonos hospites in servitutem accipiebant

₁₄et non solum hoc

sed et alius quis respectus erit

illorum

quoniam inviti recipiebant extraneos

₁₅qui autem cum laetitia receperunt hos

qui eisdem usi erant iustitiis

saevissimis adflixerunt doloribus

₁₆percussi sunt autem caecitate sicut illi in foribus iusti

cum subitaneis cooperti essent tenebris

unusquisque ostii sui transitum quaerebat

₁₇in se enim elementa dum convertuntur

sicut in organo qualitatis sonus inmutatur

et omnia suum sonum custodiunt

unde est aestimare et

ex ipso certo visu

₁₈agrestia enim in aquatica convertebantur

et quaecumque erant natantia in terram transiebant

₁₉ignis in aqua valebat supra suam virtutem

et aqua extinguentis naturae obliviscebatur

₂₀flammae e contrario corruptibilium animalium non vexaverunt carnes

coambulantium

nec dissolvebant illam quae facile dissolvitur sicut glacies bonam escam

in omnibus enim Domine magnificasti populum tuum

et honorasti et non despexisti

in omni tempore et in omni loco adsistens eis