LIBER IESU FILII SIRACH 1

Multorum nobis et magnorum per Legem et Prophetas

aliosque qui secuti sunt illos sapientiam

demonstratam,

in quibus oportet laudare Israhel doctrinae et sapientiae causa;

quia non solum ipsos loquentes necesse est

peritos,

sed etiam extraneos posse et dicentes et scribentes doctissimos fieri.

Avus meus Iesus postquam se amplius dedit

ad diligentiam lectionis Legis

et Prophetarum

et aliorum librorum qui nobis a parentibus nostris traditi sunt,

volui et ipse scribere aliquid horum quae ad

doctrinam et sapientiam pertinent,

ut desiderantes discere et illorum periti facti

magis magisque adtendant animo et confirmentur ad legitimam vitam.

Hortor itaque venire vos

cum benevolentia et adtentiore

studio lectionem facere,

et veniam habere in illis

in quibus videmur

sequentes imaginem sapientiae et deficere in verborum

conpositione.

nam deficiunt

verba hebraica quando translata fuerint

ad alteram linguam;

non solum autem haec,

sed et ipsa Lex et Prophetae

ceteraque librorum

non parvam habent differentiam quando inter se dicuntur.

Nam in octavo et tricesimo anno temporibus Ptolomei Euergetis regis,

postquam perveni in Aegyptum et cum multum temporis ibi

fecissem,

inveni libros relictos non parvae neque contemnendae

doctrinae.

Itaque bonum et necessarium putavi et ipse aliquam addere

diligentiam et laborem interpretandi istum

librum;

et multa vigilia adtuli doctrinam

in spatio temporis,

ad illa quae ad finem ducunt

librum dare,

et illis qui volunt animum intendere

et discere quemadmodum oporteat instituere mores

qui secundum legem Domini proposuerunt vitam agere.

₁Omnis sapientia a Deo Domino est

et cum illo fuit semper et est ante aevum

₂harenam maris et pluviae guttas

et dies saeculi quis dinumeravit

altitudinem caeli et latitudinem terrae

et profundum abyssi quis mensus est

₃sapientiam Dei praecedentem omnia quis investigavit

₄prior omnium creata est sapientia et intellectus prudentiae ab aevo

₅fons sapientiae verbum Dei in excelsis

et ingressus illius mandata aeterna

₆radix sapientiae cui revelata est et astutias illius quis agnovit

₇disciplina sapientiae cui revelata est et manifestata

et multiplicationem ingressus illius quis intellexit

₈unus est Altissimus creator omnipotens

rex potens et metuendus nimis

sedens super thronum illius et dominans Deus

₉ipse creavit illam spiritu sancto

et vidit et dinumeravit et mensus est

₁₀et effudit illam super omnia opera sua

et super omnem carnem secundum datum suum

et praebuit illam diligentibus se

₁₁timor Domini gloria et gloriatio et laetitia et corona exultationis

₁₂timor Domini delectabit cor

et dabit laetitiam et gaudium in longitudine

dierum

₁₃timenti Dominum bene erit in extremis

et in die defunctionis suae benedicetur

₁₄dilectio Dei honorabilis sapientia

₁₅quibus autem apparuerit in visu diligunt eam in visione

et in agnitione magnalium suorum

₁₆initium sapientiae timor Domini

et cum fidelibus in vulva concreatus est

et cum electis seminis creditur

et cum iustis et fidelibus agnoscitur

₁₇timor Domini scientiae religiositas

₁₈religiositas custodiet et iustificabit cor

iucunditatem atque gaudium dabit

₁₉timenti Deum bene erit

et in diebus consummationis illius benedicetur

₂₀plenitudo sapientiae timere Deum

et plenitudo a fructibus illius

₂₁omnem domum illius implebit a generationibus

et receptacula a thesauris illius

₂₂corona sapientiae timor Domini

repollens pacem et salutis fructum

₂₃et vidit et dinumeravit eam

utraque autem sunt dona Dei

₂₄scientiam et intellectum prudentiae sapientia conpartietur

et gloriam tenentium se inaltat

₂₅radix sapientiae est timere Dominum

rami enim illius longevi

₂₆in thesauris sapientiae intellectus et scientiae religiositas

execratio autem peccatoribus sapientia

₂₇timor Dei expellit peccatum

₂₈nam qui sine timore est non poterit iustificari

iracundia enim animositatis illius subversio illius est

₂₉usque in tempus sustinebit patiens et postea redditio iucunditatis

₃₀bonus sensus usque in tempus abscondebit verba illius

et labia multorum enarrabunt sensum illius

₃₃concupiscens sapientiam conserva iustitiam

et Deus praebebit illam tibi

₃₄sapientia enim et disciplina timor Domini

et quod beneplacitum est illi

₃₅fides et mansuetudo

et adimplebit thesauros illius

₃₆non sis incredibilis timori Domini

et ne accesseris ad illum duplici corde

₃₇ne fueris hypocrita in conspectu hominum

et non scandalizeris labiis tuis

₃₈adtende in illis ne forte cadas

et adducas animae tuae inhonorationem

₃₉et revelet Deus absconsa tua et in medio synagogae elidat te

₄₀quoniam accessisti maligne ad Dominum

et cor tuum plenum est dolo et fallacia