LIBER SAPIENTIAE 18

₁sanctis autem tuis maxima erat lux

et horum quidem vocem audiebant sed figuram non videbant

et quia non et ipsi per eadem passi erant

magnificabant

₂et qui ante laesi erant

quoniam non laedebantur gratias agebant

et ut esset differentia donum petebant

₃propter quod igni ardentem columnam

ducem habuerunt ignotae viae

et solem sine laesura boni hospitii praestitisti

₄digni quidem illi carere luce et pati carcerem tenebrarum

qui inclusos custodiebant filios tuos

per quos incipiebat incorruptum legis lumen saeculo dari

₅cum cogitarent iustorum occidere infantes

et uno exposito filio et liberato

in traductionem illorum multitudinem filiorum abstulisti

et pariter illos perdidisti in aquam validam

₆illa nox ante cognita est a parentibus

nostris

ut vere scientes quibus iuramentis crediderunt animaequiores

essent

₇suscepta est autem a populo tuo sanitas quidem

iustorum

iniustorum autem exterminatio

₈sicut enim laesisti adversarios sic nos provocans magnificasti

₉absconse enim sacrificabant iusti pueri bonorum

et iustitiae legem in concordia disposuerunt

similiter bona et mala percepturos

iustos

patri iam decantantes laudes

₁₀resonabat autem inconveniens inimicorum vox

et flebilis audiebatur planctus ploratorum infantium

₁₁simili autem poena servus cum domino adflictus

et popularis homo regi similia passus

₁₂similiter ergo omnes uno nomine mortis

mortuos habebant innumerabiles

nec enim ad sepeliendum vivi sufficiebant

quoniam uno momento

quae erat praeclarior natio illorum exterminata est

₁₃de omnibus enim non credentes propter veneficia

tunc cum fuit exterminium

primogenitorum

spoponderunt populum Dei se esse

₁₄cum enim quietum silentium contineret omnia

et nox in suo cursu medium iter haberet

₁₅omnipotens sermo tuus de caelo a regalibus sedibus

durus debellator in mediam exterminii terram prosilivit

₁₆gladius acutus insimulatum imperium tuum portans

et stans replevit omnia morte

et usque ad caelum adtingebat stans in terra

₁₇tum continuo visus somniorum malorum turbaverunt

illos

et timores supervenerunt insperati

₁₈et alius alibi proiectus semivivus

propter quam moriebatur causam demonstrabat

₁₉visiones enim quae illos turbaverunt

haec praemonebant

ne inscii quare mala patiebantur perirent

₂₀tetigit autem tunc et iustos temptatio mortis

et commotio in heremo facta est

multitudinis

sed non diu permansit ira

₂₁properans enim homo sine querella propugnavit

proferens servitutis suae scutum orationem

et per incensum deprecationem allegans

restitit irae et finem inposuit necessitati

ostendens quoniam tuus est famulus

₂₂vicit autem turbas non virtute corporis

nec armatura potentiae

sed verbo vexatorem subiecit

iuramenta parentum et testamentum commemorans

₂₃cum enim iam acervatim cecidissent super alterutrum

mortui

interstetit et amputavit impetum

et divisit illam quae ad vivos ducebat viam

₂₄in veste enim poderis quam habebat

totus erat orbis terrarum

et parentum magnalia in quattuor ordinibus lapidum erant sculpta

et magnificentia tua in diademate capitis illius erat

scripta

₂₅haec autem his cessit qui exterminabat

et haec extimuit

erat enim sola temptatio irae sufficiens