LIBER SAPIENTIAE 10

₁haec illum qui primus finctus est patrem orbis terrarum

cum solus esset creatus custodivit

₂et eduxit illum a delicto suo

et dedit illi virtutem continendi omnia

₃ab hac ut recessit iniustus in ira sua

per iram homicidii fraternitatis deperiit

₄propter quem cum aqua deleret terram iterum sanavit sapientia

per contemptibile lignum iustum gubernans

₅haec et in consensu nequitiae cum se nationes contulissent

scivit iustum et servavit sine querella Deo

et in filii misericordia

fortem custodivit

₆haec iustum a pereuntibus impiis liberavit fugientem

descendentem ignem in Pentapoli

₇cuius in testimonium nequitiae

fumigabunda constat deserta terra

et incerto tempore fructus habentes arbores

et incredibilis animae memoria stans

figmentum salis

₈sapientiam enim praetereuntes

non tantum in hoc lapsi sunt ut ignorarent bona

sed et insipientiae suae reliquerunt hominibus memoriam

ut in his quae peccaverunt nec latere

potuissent

₉sapientia autem hos qui se observant a doloribus liberavit

₁₀haec profugum irae fratris iustum

deduxit per vias rectas

et ostendit illi regnum Dei et dedit illi scientiam sanctorum

honestavit illum in laboribus et conplevit labores illius

₁₁in fraude circumvenientium illum adfuit

et honestum illum fecit

₁₂custodivit illum ab inimicis

et a seductoribus tutavit eum

et certamen forte dedit illi ut vinceret

ut sciret quoniam omnium potentior est sapientia

₁₃haec venditum iustum non dereliquit

sed a peccatoribus liberavit illum

descendit cum illo in foveam

₁₄et in vinculis non dereliquit illum

donec adferret illi sceptrum regni

et potentiam adversus eos qui eum deprimebant

et mendaces ostendit qui maculaverunt ipsum

et dedit illi claritatem aeternam

₁₅haec populum iustum et semen sine querella

liberavit a nationibus quae illum conprimebant

₁₆intravit in animam servi Domini

et stetit contra reges horrendos in portentis et signis

₁₇et reddidit iustis mercedem laborum suorum

et deduxit illos in via mirabili

et fuit illis in velamento diei

et in luce stellarum nocte

₁₈transtulit illos mare Rubrum

et transvexit illos per aquam nimiam

₁₉inimicos autem illorum demersit in mare

et ab altitudine inferorum eduxit illos

ideo iusti tulerunt spolia impiorum

₂₀et decantaverunt Domine nomen sanctum tuum

et victricem manum tuam laudaverunt pariter

₂₁quoniam sapientia aperuit os mutorum

et linguas infantium fecit dissertas