LIBER TOBIAE 13

₁aperiens autem Tobias senior os suum

benedixit Dominum et dixit

magnus es Domine in aeternum et in omnia saecula regnum tuum

₂quoniam tu flagellas et salvas

deducis ad infernum et reducis

et non est qui effugiat manum tuam

₃confitemini Domino filii Israhel et in conspectu gentium laudate eum

₄quoniam ideo dispersit vos inter gentes quae ignorant eum

ut vos narretis mirabilia eius

et faciatis scire eos quia non est alius Deus omnipotens praeter eum

₅ipse castigavit nos propter iniquitates nostras

et ipse salvabit nos propter misericordiam suam

₆aspicite ergo quae fecit vobiscum

et cum timore et tremore confitemini illi

regemque saeculorum exaltate in operibus vestris

₇ego autem in terra captivitatis meae confitebor illi

quoniam ostendit maiestatem suam in gentem peccatricem

₈convertimini itaque peccatores et facite iustitiam coram Deo

credentes quod faciat vobiscum misericordiam suam

₉ego autem et anima mea in eo laetabimur

₁₀benedicite Dominum omnes electi eius

agite dies laetitiae et confitemini illi

₁₁Hierusalem civitas Dei castigavit te Dominus in operibus manuum tuarum

₁₂confitere Domino in bonis

et benedic Deum saeculorum

ut reaedificet in te tabernaculum suum

et revocet ad te omnes captivos

et gaudeas in omnia saecula saeculorum

₁₃luce splendida fulgebis et omnes fines terrae adorabunt te

₁₄nationes ex longinquo ad te venient

et munera deferentes adorabunt Dominum in te

et terram tuam in sanctificatione habebunt

₁₅nomen magnum invocabunt in te

₁₆maledicti erunt qui contempserint te

et condemnati erunt omnes qui blasphemaverint te

benedictique erunt qui aedificaverint te

₁₇tu autem laetaberis in filiis tuis

quoniam omnes benedicentur et congregabuntur ad Dominum

₁₈beati omnes qui diligunt te et qui gaudent super pace tua

₁₉anima mea benedic Dominum

quoniam liberavit Hierusalem civitatem suam

₂₀beatus ero si fuerint reliquiae seminis mei

ad videndam claritatem Hierusalem

₂₁portae Hierusalem ex sapphyro et zmaragdo aedificabuntur

et ex lapide pretioso omnis circuitus murorum eius

₂₂ex lapide candido et mundo omnes plateae eius sternentur

et per vicos eius alleluia cantabitur

₂₃benedictus Dominus qui excitavit eam

ut sit regnum eius in saecula saeculorum super eam amen