LIBER TOBIAE 12

₁tunc vocavit ad se Tobias filium suum dixitque ei

quid possumus dare viro isti sancto qui venit tecum

₂respondens Tobias dixit

pater quam mercedem dabimus ei

aut quid dignum poterit esse beneficiis eius

₃me duxit et reduxit sanum

pecuniam a Gabelo ipse suscepit

uxorem ipse me habere fecit

et daemonium ab ea conpescuit

gaudium parentibus eius fecit

me ipsum a devoratione piscis eripuit

te quoque fecit videre lumen caeli

et bonis omnibus per eum repleti sumus

quid illi ad haec dignum poterimus dare

₄sed peto te pater mi ut roges eum

si forte dignabitur

medietatem de omnibus quae adlata sunt

sibi adsumere

₅et vocantes eum pater scilicet et filius tulerunt eum in partem

et rogare coeperunt ut dignaretur

dimidiam partem omnium quae adtulerant acceptam habere

₆tunc dixit eis occulte

benedicite Deum caeli

et coram omnibus viventibus confitemini illi

quoniam fecit vobiscum misericordiam suam

₇etenim sacramentum regis abscondere bonum est

opera autem Dei revelare et confiteri honorificum est

₈bona est oratio cum ieiunio et elemosyna

magis quam thesauros auri condere

₉quoniam elemosyna a morte liberat et ipsa est quae purgat peccata

et faciet invenire vitam aeternam

₁₀qui autem faciunt peccatum et iniquitatem

hostes sunt animae suae

₁₁manifesto ergo vobis veritatem

et non abscondam a vobis sermonem occultum

₁₂quando orabas cum lacrimis et sepeliebas mortuos

et derelinquebas prandium

et mortuos abscondebas per diem in domo tua

et nocte sepeliebas

ego obtuli orationem tuam Domino

₁₃et quia acceptus eras Deo necesse fuit ut temptatio probaret te

₁₄et nunc misit me Dominus ut curarem te

et Sarram uxorem filii tui a daemonio liberarem

₁₅ego enim sum Rafahel angelus

unus ex septem qui adstamus ante Dominum

₁₆cumque haec audissent turbati sunt

et trementes ceciderunt super faciem suam

₁₇dixitque eis angelus pax vobis nolite timere

₁₈etenim cum essem vobiscum per voluntatem Dei

ipsum benedicite et cantate illi

₁₉videbar quidem vobiscum manducare et bibere

sed ego cibo invisibili et potu qui ab hominibus videri non potest utor

₂₀tempus est ergo ut revertar ad eum qui me misit

vos autem benedicite Deum et narrate omnia mirabilia eius

₂₁et cum haec dixisset ab aspectu eorum ablatus est

et ultra eum videre non potuerunt

₂₂tunc prostrati per horas tres in faciem benedixerunt Deum

et exsurgentes narraverunt omnia mirabilia eius