CANTICUM CANTICORUM 8

₁quis mihi det te fratrem meum sugentem ubera matris meae

ut inveniam te foris et deosculer

et iam me nemo despiciat

₂adprehendam te et ducam in domum matris meae

ibi me docebis et dabo tibi poculum ex vino condito

et mustum malorum granatorum meorum

₃leva eius sub capite meo

et dextera illius amplexabitur me

₄adiuro vos filiae Hierusalem

ne suscitetis et evigilare

faciatis dilectam donec ipsa velit

₅quae est ista quae ascendit de deserto deliciis affluens

et nixa super dilectum suum

sub arbore malo suscitavi te

ibi corrupta est mater tua ibi violata est genetrix tua

₆pone me ut signaculum super cor tuum

ut signaculum super brachium tuum

quia fortis est ut mors dilectio

dura sicut inferus aemulatio

lampades eius lampades ignis atque flammarum

₇aquae multae non poterunt extinguere

caritatem

nec flumina obruent illam

si dederit homo omnem substantiam domus suae pro dilectione

quasi nihil despicient eum

₈soror nostra parva et ubera non habet

quid faciemus sorori nostrae in die quando adloquenda est

₉si murus est aedificemus super eum propugnacula argentea

si ostium est conpingamus illud tabulis cedrinis

₁₀ego murus et ubera mea sicut turris

ex quo facta sum coram eo quasi pacem repperiens

₁₁vinea fuit Pacifico in ea quae habet populos

tradidit eam custodibus

vir adfert pro fructu eius mille argenteos

₁₂vinea mea coram me est

mille tui Pacifice

et ducenti his qui custodiunt fructus eius

₁₃quae habitas in hortis amici auscultant

fac me audire vocem tuam

₁₄fuge dilecte mi

et adsimilare capreae hinuloque cervorum super montes aromatum