CANTICUM CANTICORUM 7

₁quid videbis in Sulamiten nisi choros castrorum

quam pulchri sunt gressus tui in calciamentis filia principis

iunctura feminum tuorum

sicut monilia quae fabricata sunt manu artificis

₂umbilicus tuus crater tornatilis numquam indigens poculis

venter tuus sicut acervus tritici vallatus liliis

₃duo ubera tua sicut duo hinuli gemelli capreae

₄collum tuum sicut turris eburnea

oculi tui sicut piscinae in Esebon

quae sunt in porta filiae multitudinis

nasus tuus sicut turris Libani quae respicit contra Damascum

₅caput tuum ut Carmelus

et comae capitis tui sicut purpura regis vincta

canalibus

₆quam pulchra es et quam decora carissima in deliciis

₇statura tua adsimilata est palmae et ubera tua botris

₈dixi ascendam in palmam adprehendam fructus eius

et erunt ubera tua sicut botri vineae

et odor oris tui sicut malorum

₉guttur tuum sicut vinum optimum

dignum dilecto meo ad potandum

labiisque et dentibus illius ruminandum

₁₀ego dilecto meo et ad me conversio eius

₁₁veni dilecte mi egrediamur in agrum commoremur in villis

₁₂mane surgamus ad vineas videamus si floruit vinea

si flores fructus parturiunt si floruerunt mala punica

ibi dabo tibi ubera mea

₁₃mandragorae dederunt odorem in portis nostris

omnia poma nova et vetera dilecte mi servavi tibi