LIBER IESU FILII SIRACH 7

₁noli facere mala et non te adprehendent

₂discede ab iniquo et deficient mala abs te

₃non semines mala in sulcis iniuriae

et non metes ea in septuplum

₄noli quaerere ab homine ducatum

neque a rege cathedram honoris

₅non te iustifices ante Deum quoniam agnitor cordis ipse est

et penes regem noli velle videri sapiens

₆noli quaerere fieri iudex

nisi si valeas virtute inrumpere

iniquitates

ne forte extimescas faciem potentis

et ponas scandalum in agilitate tua

₇non pecces in multitudinem civitatis

nec te inmittas in populum

₈neque alliges duplicia peccata nec enim in uno eris inmunis

₉noli esse pusillanimis in anima tua

₁₀exorare et facere elemosynam non despicias

₁₁ne dicas in multitudine munerum meorum respiciet Deus

et offerentem me Deo altissimo suscipiet munera mea

₁₂non inrideas hominem in amaritudine animae

est enim qui humiliat et exaltat circumspector Deus

₁₃noli amare mendacium adversus fratrem tuum

neque amico similiter facias

₁₄noli velle mentiri omne mendacium

adsiduitas enim illius non bona

₁₅noli verbosus esse in multitudine presbyterorum

et non iteres verbum in tua oratione

₁₆non oderis laboriosa opera

et rusticationem ab Altissimo creatam

₁₇non te reputes in multitudine indisciplinatorum

₁₈memento irae quoniam non tardabit

₁₉humilia valde spiritum tuum

quoniam vindicta carnis impii ignis et vermes

₂₀noli praevaricari in amicum pecunia

differenti

neque fratrem carissimum auro spreveris

₂₁noli discedere a muliere sensata et bona

quam sortitus es in timore Dei

gratia enim verecundiae illius super aurum

₂₂non laedas servum operantem in veritate

neque mercennarium dantem animam suam

₂₃servus sensatus dilectus quasi anima tua

non defraudes illum libertate

neque inopem derelinquas illum

₂₄pecora tibi sunt adtende illis

et si sunt utilia perseverent apud te

₂₅filii tibi sunt erudi illos et curva illos a pueritia illorum

₂₆filiae tibi sunt serva corpus illarum

et non ostendas hilarem faciem tuam ad illas

₂₇trade filiam et grande opus feceris et homini sensato da illam

₂₈mulier si est tibi secundum animam tuam non proicias illam

et odibili non credas te in toto corde

₂₉honora patrem tuum et gemitus matris tuae ne obliviscaris

₃₀memento quoniam nisi per illos non fuisses

et retribue illis quomodo et illi tibi

₃₁in tota anima tua time Deum

et sacerdotes illius sanctifica

₃₂in omni virtute dilige eum qui te fecit

et ministros eius non derelinquas

₃₃honora Deum ex tota anima tua et honorifica sacerdotes

et propurga te cum brachiis

₃₄da illi partem sicut mandatum est tibi primitiarum et

purgationis

et de neglegentia purga te cum paucis

₃₅datum brachiorum tuorum et sacrificium sanctificationis offers initia sanctorum

₃₆et pauperi porrige manum tuam

ut perficiatur propitiatio et benedictio tua

₃₇gratia datus in conspectu omnis viventis

et mortuo non prohibeas gratiam

₃₈non desis plorantibus in conrogatione

et cum lugentibus ambula

₃₉non te pigeat visitare infirmum

ex his enim in dilectione firmaberis

₄₀in omnibus operibus tuis memorare novissima tua

et in aeternum non peccabis