LIBER IESU FILII SIRACH 6

₁noli fieri pro amico inimicus proximo

inproperium enim et contumeliam malus hereditabit

et omnis peccator invidus et bilinguis

₂non te extollas in cogitatione animae tuae velut taurus

ne forte elidatur virtus tua per stultitiam

₃et folia tua comedet et fructus tuos perdet

et relinqueris velut lignum aridum in heremo

₄anima enim nequa disperdet qui se habet

et in gaudium inimici dat illum

et deducit in sortem impiorum

₅verbum dulce multiplicat amicos et mitigat inimicos

et lingua eucharis in bono homine abundat

₆multi pacifici sint tibi

et consiliarii tibi sint unus de mille

₇si possides amicum in temptatione posside eum

et non facile credas illi

₈est enim amicus secundum tempus suum

et non permanebit in die tribulationis

₉et est amicus qui egreditur ad

inimicitiam

et est amicus qui odium et rixam et convicia denudabit

₁₀est autem amicus socius mensae

et non permanet in die necessitatis

₁₁amicus si permanserit fixus erit tibi quasi coaequalis

et in domesticis tuis fiducialiter aget

₁₂si humiliaverit se contra te

et a facie tua abscondet se

unianimem habebis amicitiam bonam

₁₃ab inimicis tuis separare et ab amicis tuis adtende

₁₄amicus fidelis protectio fortis

qui autem invenit illum invenit thesaurum

₁₅amico fideli nulla est conparatio

et non est digna ponderatio auri et argenti contra bonitatem fidei

illius

₁₆amicus fidelis medicamentum vitae et inmortalitatis

et qui metuunt Dominum inveniunt illum

₁₇qui timet Deum aeque habebit amicitiam bonam

quoniam secundum illum erit amicus illius

₁₈fili a iuventute tua excipe doctrinam

et usque ad canos invenies sapientiam

₁₉quasi is qui arat et seminat accede ad illam

et sustine bonos fructus illius

₂₀in opere enim ipsius exiguum laborabis

et cito edes de generationibus illius

₂₁quam aspera est nimium sapientia indoctis hominibus

et non permanet in illa excors

₂₂quasi lapidis virtus probatio erit in illis

et non demorabuntur proicere illum

₂₃sapientia enim doctrinae secundum nomen est eius

et non multis est manifesta

quibus autem agnita est

permanet usque ad conspectum Dei

₂₄audi fili et accipe consilium intellectus

et ne abicias consilium meum

₂₅inice pedem tuum in conpedes illius

et in torques eius tuum collum

₂₆subice umerum tuum et porta illam

et ne acedieris vinculis eius

₂₇in omni animo tuo accede ad illam

et in omni virtute tua serva vias eius

₂₈investiga illam et manifestabitur tibi

et continens factus ne derelinqueris

eam

₂₉in novissimis enim invenies requiem in ea

et convertetur tibi in oblectationem

₃₀et erunt tibi conpedes in protectionem fortitudinis et bases virtutis

et torques illius in stolam gloriae

₃₁decor enim vitae est in illa

et vincula illius netura salutaris

₃₂stolam gloriae indues eam

et coronam gratulationis superpones tibi

₃₃fili si adtenderis mihi disces

et si adcommodaveris animam tuam sapiens

eris

₃₄et si inclinaveris aurem tuam excipies doctrinam

et si dilexeris audire sapiens eris

₃₅in multitudine presbyterorum prudentium sta

et sapientiae illorum ex corde coniungere

ut omnem narrationem Dei possis audire

et proverbia laudis non effugiant te

₃₆et si videris sensatum evigila ad illum

et gradus ostiorum illius exterat pes tuus

₃₇cogitatum habe in praeceptis Dei

et in mandatis illius maxime adsiduus esto

et ipse dabit cor tibi

et concupiscentia sapientiae dabitur tibi