LIBER IESU FILII SIRACH 5

₁noli adtendere ad possessiones iniquas

et ne dixeris est mihi sufficiens vita

nihil enim proderit in tempore vindictae et obductionis

₂non sequaris concupiscentiam cordis

₃et ne dixeris quomodo potui

aut quis me subiciet propter facta mea

Deus enim vindicans vindicabit

₄ne dixeris peccavi et quid accidit mihi triste

Altissimus enim est patiens redditor

₅de propitiatu peccatorum noli esse sine metu

neque adicias peccatum super peccatum

₆et ne dicas miseratio Dei magna est

multitudinis peccatorum meorum miserebitur

₇misericordia enim et ira ab illo

et in peccatores respicit ira illius

₈non tardes converti ad Deum

et ne differas de die in diem

₉subito enim venit ira illius

et in tempore vindictae disperdet te

₁₀noli anxius esse in divitiis iniustis

nihil enim proderunt tibi in die obductionis et vindictae

₁₁non ventiles te in omnem ventum

et non eas in omni via

sic enim peccator probatur duplici lingua

₁₂esto firmus in via Dei

et in veritate sensus tui et scientia

et prosequatur te verbum pacis et iustitiae

₁₃esto mansuetus ad audiendum verbum ut

intellegas

et cum sapientia fers responsum verum

₁₄si est tibi intellectus responde proximo

sin autem sit manus tua super os tuum

ne capiaris in verbo indisciplinato et confundaris

₁₅honor et gloria in sermone sensati

lingua inprudentis subversio

ipsius

₁₆non appelleris susurrio

et lingua tua capiaris et confundaris

₁₇super furem enim est confusio et paenitentia

et denotatio pessima super bilinguem

susurratori autem odium et inimicitia et contumelia

₁₈iustifica pusillo et magno similiter