LIBER IESU FILII SIRACH 43

₁altitudinis firmamentum pulchritudo est

species caeli in visione gloriae

₂sol in aspectu adnuntians in exitu vas admirabile opus Excelsi

₃in meridiano exuret terram

in conspectu ardoris eius quis poterit sustinere

fornacem custodiens in operibus ardoris

₄tripliciter sol exurens montes radios igneos exsuflans

et refulgens radiis suis obcaecat oculos

₅magnus Dominus qui fecit illum

et in sermonibus eius festinavit iter

₆et luna in omnibus in tempore suo

ostensio temporis et signum aevi

₇a luna signum diei festi

luminare quod minuitur in consummatione

₈mensis secundum nomen eius est

crescens admirabiliter in consummatione

₉vas castrorum in excelsis

in firmamento caeli resplendens

₁₀species caeli gloriosa stellarum

mundum inluminans in excelsis Dominus

₁₁in verbis Sancti stabunt ad iudicium

et non exardescent in vigiliis suis

₁₂vide arcum et benedic qui fecit illum

valde speciosus est in splendore suo

₁₃gyravit caelum in circuitu gloriae suae

manus Excelsi aperuerunt illum

₁₄imperio suo adceleravit nivem

et adcelerat coruscationes emittere iudicii sui

₁₅propterea aperti sunt thesauri et evolaverunt nebulae sicut aves

₁₆in magnitudine sua posuit nubes

et confracti sunt lapides grandinis

₁₇in conspectu eius commovebuntur montes

et in voluntate eius adspirabit notus

₁₈vox tonitrui eius exprobravit terram

tempestas aquilonis et congregatio spiritus

₁₉sicut avis deponens ad sedendum aspargit nivem

et sicut lucusta demergens descensus eius

₂₀pulchritudinem coloris eius admirabitur

oculus

et super imbrem eius expavescet cor

₂₁gelum sicut salem effundet super terram

et dum gelaverit fiet tamquam cacumina tribuli

₂₂frigidus ventus aquilo flabit

et gelabit cristallus ab aqua

super omnem congregationem aquarum requiescet

et sicut lorica induet se aquis

₂₃devorabit montes et exuret desertum

et extinguet viridem sicut ignem

₂₄medicina omnium in festinationem

nebulae

ros obvians ab ardore venienti humilem efficiet

eum

₂₅in sermone eius silebit ventus

et plantavit illum Dominus Iesus

₂₆qui navigat mare enarrat

periculum eius

et audientes auribus non admirabimur

₂₇illic praeclara et mirabilia opera

varia genera bestiarum et omnium pecorum et creatura

beluarum

₂₈propter ipsum confirmatus est itineris finis

et in sermone eius conposita sunt omnia

₂₉multa dicemus et deficiemus

verbis

consummatio autem sermonum ipse est in omnibus

₃₀gloriantes ad quid valebimus

ipse enim Omnipotens super omnia opera sua

₃₁terribilis Dominus et magnus vehementer

₃₂quantumcumque potueritis supervalebit

adhuc

et admirabilis magnificentia eius

₃₃benedicentes Dominum exaltate illum quantum potestis

maior est enim omni laude

₃₄exaltantes eum replemini virtute

ne laboretis non enim habebitis

₃₅quis vidit eum et enarrabit

et quis magnificabit eum sicut est ab initio

₃₆multa abscondita sunt maiora horum

pauca enim vidimus operum eius

₃₇omnia autem Dominus fecit et pie agentibus dedit sapientiam