LIBER IESU FILII SIRACH 44

₁laus patrum

Laudemus viros gloriosos et parentes nostros in generatione sua

₂multam gloriam fecit Dominus magnificentia sua a saeculo

₃dominantes in potestatibus suis

homines magni virtute et prudentia sua praediti

nuntiantes in dignitate

prophetarum

₄et imperantes in praesenti populo

et virtute prudentiae populi sanctissima verba

₅in pueritia sua requirentes modos musicos

et narrantes carmina in scriptura

₆homines divites in virtute pulchritudinis studium habentes

pacificantes in domibus suis

₇omnes isti in generationibus gentis suae gloriam adepti sunt

et in diebus suis habentur in laudibus

₈qui de illis nati sunt reliquerunt nomen narrandi laudes eorum

₉et sunt quorum non est memoria

perierunt quasi non fuerint

et nati sunt quasi non nati et filii ipsorum cum illis

₁₀sed illi viri misericordiae sunt quorum pietates non defuerunt

₁₁et cum semine ipsorum perseverat bona

₁₂hereditas

nepotum illorum et in

testamentis stetit semen

eorum

₁₃et filii ipsorum propter

illos usque in aeternum manet semen eorum

et gloria eorum non derelinquetur

₁₄corpora ipsorum in pace sepulta sunt

et nomen eorum vivet in generationes et

generationes

₁₅sapientiam ipsorum narrent populi

laudem eorum nuntiet ecclesia

₁₆Enoch placuit Deo et translatus est in paradiso

ut det gentibus paenitentiam

₁₇Noe inventus est perfectus iustus

et in tempore iracundiae factus est reconciliatio

₁₈ideo dimissum est reliquum terrae

cum factum est diluvium

₁₉testamenta saeculi posita sunt apud illum

ne deleri possit diluvio omnis caro

₂₀Abraham magnus pater multitudinis gentium

et non est inventus similis illi in gloria

qui conservavit legem Excelsi et fuit in testamento cum illo

₂₁in carne eius stare fecit testamentum

et in temptatione inventus est fidelis

₂₂ideo iureiurando dedit illi semen in gente sua

crescere illum quasi terrae cumulum

₂₃et ut stellas exaltare semen eius

et hereditari illos a mari usque ad mare

et a Flumine usque ad terminos terrae

₂₄et in Isaac eodem fecit modo

propter Abraham patrem ipsius

₂₅benedictionem omnium gentium dedit illi

et testamentum confirmavit super caput Iacob

₂₆agnovit eum in benedictionibus suis et dedit illi hereditatem

et divisit ei partem in tribus duodecim

₂₇et conservavit illis homines misericordiae

invenientes gratiam in oculis omnis carnis