LIBER IESU FILII SIRACH 42

₁non duplices sermonem auditus de revelatione sermonis absconditi

et eris vere sine confusione

et invenies gratiam in conspectu omnium hominum

ne pro his omnibus confundaris

et ne accipias personam ut delinquas

₂de lege Altissimi et testamento

et de iudicio iustificare impium

₃de verbo sociorum et viatorum et de datione hereditatis amicorum

₄de aequalitate staterae et ponderum

et de adquisitione multorum et paucorum

₅de correptione emptionis et negotiatorum

et de multa disciplina filiorum

servo pessimo latus sanguinare

₆super mulierem nequam bonum est signum

₇ubi manus multae sunt clude

et quodcumque trades numera et adpende

datum vero et acceptum omne describe

₈de disciplina insensati et fatui

et de senioribus qui iudicantur ab adulescentibus

et eris eruditus in omnibus

et probabilis in conspectu omnium virorum

₉filia patri

abscondita est vigilia

et sollicitudo eius auferet somnum

ne forte in adulescentia sua adultera

efficiatur

et commorata cum viro odibilis fiat

₁₀nequando polluatur in virginitate sua

et in paternis suis gravida inveniatur

ne forte cum viro commorata transgrediatur

aut certe sterilis efficiatur

₁₁super filiam luxuriosam confirma custodiam

nequando faciat te in obprobrium venire inimicis

a detractatione in civitate et abiectione

plebis

et confundat te in multitudine populi

₁₂omni homini noli intendere in specie

et in medio mulierum noli commorari

₁₃de vestimentis enim procedit tinea

et a muliere iniquitas viri

₁₄melior est iniquitas viri quam benefaciens mulier

et mulier confundens in obprobrium

₁₅memor ero igitur operum Domini et quae vidi adnuntiabo

in sermonibus Domini opera eius

₁₆sol inluminans per omnia respexit

et gloria Domini plenum est opus eius

₁₇nonne Dominus fecit sanctos enarrare omnia mirabilia sua

quae confirmavit Dominus omnipotens stabiliri in

gloria sua

₁₈abyssum et cor hominum investigavit

et in astutia illorum excogitavit

₁₉cognovit enim Dominus omnem scientiam

et inspexit in signum aevi

adnuntians quae praeterierunt et quae superventura sunt

revelans vestigia occultorum

₂₀non praeterit illum omnis cogitatus

et non abscondit se ab eo ullus sermo

₂₁magnalia sapientiae suae decoravit

qui est ante saeculum et usque in saeculum

neque adiectum est

₂₂neque minuitur

et non eget alicuius consilio

₂₃quam desiderabilia omnia opera eius

et tamquam scintillam quam est considerare

₂₄omnia haec vivent et manent in saeculum

et in omni necessitate omnia obaudiunt ei

₂₅omnia duplicia unum contra unum et non fecit quicquam deesse

₂₆uniuscuiusque confirmavit bona

et quis satiabitur videns gloriam eius