LIBER IESU FILII SIRACH 41

₁o mors quam amara est memoria tua

homini pacem habenti in substantiis suis

₂viro quieto et cuius viae directae sunt in omnibus

et adhuc valenti accipere cibum

₃o mors bonum est iudicium tuum

homini indigenti et qui minoratur viribus

₄defecto aetate et cui de omnibus cura est

et incredibili qui perdit sapientiam

₅noli metuere iudicium mortis

memento quae ante te fuerunt et quae superventura sunt tibi

hoc iudicium a Domino omni carni

₆et quid superveniet in beneplacita Altissimi

sive decem sive centum sive mille anni

₇non est enim in inferno accusatio vitae

₈filii abominationum fiunt filii peccatorum

et qui conversantur secus domos impiorum

₉filiorum peccatorum periet hereditas

et cum semine illorum adsiduitas obprobrii

₁₀de patre impio queruntur filii

quoniam propter illum sunt in obprobrio

₁₁vae vobis viri impii qui dereliquistis legem Domini altissimi

₁₂et si nati fueritis in maledictione nascemini

et si mortui fueritis in maledictione erit pars vestra

₁₃omnia quae de terra sunt in terram convertentur

sic impii a maledicto in perditionem

₁₄luctus hominum in corpore ipsorum

nomen autem impiorum delebitur

₁₅curam habe de bono nomine

hoc enim magis permanebit tibi

quam mille thesauri magni pretiosi

₁₆bonae vitae numerus dierum

bonum autem nomen permanebit in aevo

₁₇disciplinam in pace conservate filii

sapientia enim abscondita et thesaurus occultus

quae utilitas in utrisque

₁₈melior est homo qui abscondit stultitiam suam

quam homo qui abscondit sapientiam suam

₁₉verumtamen reveremini in his quae procedunt de ore meo

₂₀non est enim bonum omnem inreverentiam observare

et non omnia omnibus beneplacent in fide

₂₁erubescite matrem et patrem de fornicatione

et a praesidente et potente de mendacio

₂₂a principe et iudice de delicto

a synagoga et plebe de iniquitate

₂₃a socio et amico de iniustitia

de loco in quo habitas

₂₄de furto

de veritate Dei et testamento

de discubitu in panibus et ab offuscatione dati et accepti

₂₅a salutantibus de silentio

a respectu mulieris fornicariae

et ab aversione vultus cognati

₂₆ne avertas faciem a proximo tuo

ab auferendo partem et non restituendo

₂₇ne respicias mulierem alieni viri et ne scruteris ancillam eius

neque steteris ad lectum eius

₂₈ab amicis de sermonibus inproperii

et cum dederis ne inproperes