LIBER IESU FILII SIRACH 40

₁occupatio magna creata est omnibus hominibus

et iugum grave super filios Adam

a die exitus de ventre matris eorum

usque in diem sepulturae in matrem omnium

₂cogitationes eorum et timores cordis

adinventio expectationis et dies finitionis

₃residentes super sedem gloriosam

usque ad humiliatum in terra et cinere

₄ab eo qui utitur hyacintho et portat coronam

usque ad eum qui operitur lino crudo

furor zelus tumultus fluctuatio et timor mortis

iracundia perseverans et contentio

₅et in tempore refectionis in cubile

somnus noctis inmutat scientiam eius

₆modicum tamquam nihil in requie

et ab eo in somnis quasi in die respectus

₇conturbatus est in visu cordis sui

tamquam qui evaserit in die belli

in tempore salutis suae exsurrexit

et admirans ad nullum timorem

₈cum omni carne ab homine usque ad pecus

et super peccatores septuplum

₉ad haec mors sanguis contentio et romphea

oppressiones famis et contritio et flagella

₁₀super iniquos creata sunt haec omnia

et propter illos factus est cataclysmus

₁₁omnia quae de terra sunt in terram convertentur

et aquae omnes in mare convertentur

₁₂omne munus et iniquitas delebitur et fides in saeculum stabit

₁₃substantiae iniustorum sicut fluvius siccabuntur

et sicut tonitruum magnum in pluvia manebunt

₁₄in aperiendo manus suas laetabitur

sic praevaricatores in consummatione tabescent

₁₅nepotes impiorum non multiplicabunt ramos

et radices inmundae super cacumen petrae sonant

₁₆viriditas super omnem aquam

et ad oram fluminis ante omnem faenum

evelletur

₁₇gratia sicut paradisus in benedictionibus

et misericordia in saeculo permanet

₁₈vita sibi sufficientis operarii condulcabitur

et in ea invenies thesaurum

₁₉fili

aedificatio civitatis confirmabit nomen

et super haec mulier inmaculata conputatur

₂₀vinum et musica laetificant cor

et super utraque dilectio sapientiae

₂₁tibiae et psalterium suavem faciunt melodiam

et super utraque lingua suavis

₂₂gratiam et speciem desiderabit oculus tuus

et super hoc viride sationis

₂₃amicus et sodalis in tempore convenientes

et super utrosque mulier cum viro

₂₄fratres in adiutorium in tempore tribulationis

et super eos misericordia liberabit

₂₅aurum et argentum constituet pedem

et super utrumque consilium beneplacitum

₂₆facultates et virtutes exaltant cor et super haec timor Domini

₂₇non est in timore Domini minoratio

et non est in eo inquirere adiutorium

₂₈timor Domini sicut paradisus benedictionis

et super omnem gloriam operuerunt illum

₂₉fili in tempore vitae tuae ne indigeas

melius est enim mori quam indigere

₃₀vir respiciens in mensam alienam

non est vita eius in cogitatione victus

alit enim animam suam cibis alienis

₃₁vir autem disciplinatus et eruditus custodiet se

₃₂in ore inprudentis condulcabitur inopia

et in ventre eius ignis ardebit