LIBER IESU FILII SIRACH 39

₁sapientiam omnium antiquorum exquiret

et in prophetiis vacabit

₂narrationem virorum nominatorum conservabit

et in versutias parabolarum simul introibit

₃occulta proverbiorum exquiret

et in absconditis parabolarum conversabitur

₄in medio magnatorum ministrabit

et in conspectu praesidis apparebit

₅in terram alienarum gentium pertransiet

bona enim et mala in hominibus temptavit

₆cor suum tradet ad vigilandum diluculo ad Dominum qui fecit illum

et in conspectu Altissimi deprecabitur

₇aperiet os suum in oratione et pro delictis suis deprecabitur

₈si enim Dominus magnus voluerit

spiritu intellegentiae replebit illum

₉et ipse tamquam imbres mittet eloquia sapientiae suae

et in oratione confitebitur Domino

₁₀ipse diriget consilium eius et disciplinam

et in absconditis suis consiliabitur

₁₁ipse palam faciet disciplinam doctrinae suae

et in lege testamenti Domini gloriabitur

₁₂conlaudabunt multi sapientiam eius

et usque in saeculum non delebitur

₁₃non recedet memoria eius

et nomen eius requiretur a generatione in generationem

₁₄sapientiam eius enarrabunt gentes

et laudem eius nuntiabit ecclesia

₁₅si inmanserit nomen derelinquet mille

et si requieverit proderit illi

₁₆adhuc consiliabor ut enarrem ut furore enim repletus sum

₁₇in voce dicit obaudite me divini fructus

et quasi rosa plantata super rivum aquarum

fructificate

₁₈quasi libanus odorem suavitatis habete

₁₉florete flores quasi lilium date odorem et frondete in

gratiam

et conlaudate canticum et benedicite Dominum in operibus suis

₂₀date nomini eius magnificentiam

et confitemini illi in voce labiorum vestrorum

in canticis labiorum et cinyris

et sic dicetis in confessione

₂₁opera Domini universa bona valde

₂₂in verbo eius stetit aqua sicut congeries

et in sermone oris eius sicut exceptoria aquarum

₂₃quoniam in praecepto ipsius placor fit

et non est minoratio in salute illius

₂₄opera omnis carnis coram illo

et non est quicquam absconditum ab oculis eius

₂₅a saeculo usque in saeculum respicit

et nihil est mirabile in conspectu eius

₂₆non est dicere quid est hoc aut quid est illud

omnia enim in tempore suo quaerentur

₂₇benedictio illius quasi fluvius inundavit

₂₈et quomodo cataclysmus aridam inebriavit

sic ira ipsius gentes quae non exquisierunt eum hereditabit

₂₉quomodo convertit aquas et siccata est terra

et viae illius viis illorum directae sunt

sic peccatoribus offensiones in ira eius

₃₀bona bonis creata sunt ab initio sic nequissimis bona et mala

₃₁initium necessariae rei vitae hominum

aqua ignis et ferrum lac et panis similagineus

et mel et botrus uvae et oleum et vestimentum

₃₂haec omnia sanctis in bona

sic et impiis et peccatoribus in mala convertentur

₃₃sunt spiritus qui ad vindictam creati sunt

et in furore suo confirmaverunt tormenta sua

₃₄in tempore consummationis effundent virtutem

et furorem eius qui fecit illos confundent

₃₅ignis grando famis et mors omnia haec ad vindictam creata sunt

₃₆bestiarum dentes et scorpii et serpentes

et romphea vindicans in exterminium impios

₃₇in mandatis eius epulabuntur

et super terram in necessitatem praeparabuntur

et in temporibus suis non praeterient verbum

₃₈propterea ab initio confirmatus et consiliatus sum

et cogitavi et in scripta dimisi

₃₉omnia opera Domini bona

et omne opus hora sua subministrabit

₄₀non est dicere hoc illo nequius est

omnia enim in tempore suo conprobabuntur

₄₁et nunc in omni corde et ore conlaudate

et benedicite nomen Domini