LIBER IESU FILII SIRACH 38

₁honora medicum propter necessitatem

etenim illum creavit Altissimus

₂a Deo est omnis medella

et a rege accipiet dationem

₃disciplina medici exaltabit caput illius

et in conspectu magnatorum conlaudabitur

₄Altissimus creavit de terra medicinam

et vir prudens non abhorrebit illi

₅nonne a ligno indulcata est amara aqua

₆ad agnitionem hominum virtutis

illorum

et dedit homini scientiam Altissimus

honorari in mirabilibus suis

₇in his curans mitigavit dolorem

et unguentarius facit pigmentum suavitatis

et unctiones conficiet suavitatis

et non consummabuntur opera eius

₈pax enim Dei super faciem terrae

₉fili in tua infirmitate non despicias

sed ora ad Dominum et ipse curabit te

₁₀averte a delicto et dirige manus

et ab omni delicto munda cor tuum

₁₁da suavitatem et memoriam similaginis

et inpingua oblationem et da locum medico

₁₂etenim illum Dominus creavit

et non discedat a te quoniam opera eius sunt necessaria

₁₃est enim tempus quando in manus eorum incurras

₁₄ipsi vero Dominum deprecabuntur ut dirigat requiem eorum

et sanitatem propter conversationem illorum

₁₅qui delinquit in conspectu eius qui fecit eum

incidat in manus medici

₁₆fili in mortuum produc lacrimas et quasi dira passus incipe plorare

et secundum iudicium contine

corpus illius

et non despicias sepulturam illius

₁₇propter delaturam amare fer luctum illius uno die

et consolare propter tristitiam

₁₉a tristitia enim festinat mors et cooperiet

virtutem

et tristitia cordis flectet cervicem

₂₀in abductione permanet tristitia

et substantia inopis secundum cor eius

₂₁non dederis in tristitia cor tuum sed repelle eam a te

et memento novissimorum

₂₂noli oblivisci neque enim est conversio

et huic nihil proderis et te ipsum pessimabis

₂₃memor esto iudicii mei sic enim erit et tuum

mihi heri et tibi hodie

₂₄in requie mortui requiescere fac memoriam eius

et consolare illum in exitu spiritus sui

₂₅sapientiam scribe in tempore vacuitatis

et qui minoratur actu sapientiam percipiet

qua sapientia replebitur

₂₆qui tenet aratrum et non gloriatur in iaculo

stimulo boves agit

et conversatur in operibus eorum

et narratio eius in filiis taurorum

₂₇cor suum dabit ad versandos sulcos

et vigilia eius in sagina vaccarum

₂₈sic omnis faber et architectus qui noctem tamquam diem transigit

qui sculpit signacula sculptilia

et adsiduitas eius variat picturam

cor suum dabit in similitudinem picturae

et vigilia sua perficit opus

₂₉sic faber ferrarius sedens iuxta incudem et considerans opus ferri

vapor ignis uret carnes eius

et in calore fornacis concertatur

₃₀vox mallei innovabit aurem eius

et contra similitudinem vasi oculi

eius

₃₁cor suum dabit in consummationem operum

et vigilia sua ornabit in consummatione

₃₂sic figulus sedens ad opus suum

convertens pedibus suis rotam

qui in sollicitudine positus est semper

propter opus suum

et innumera est omnis operatio eius

₃₃in brachio suo formabit lutum

et ante pedes suos curvabit virtutem suam

₃₄cor suum dabit ut consummet linitionem

et vigilia sua mundabit fornacem

₃₅omnes hi in manibus suis speraverunt

et unusquisque in arte sua sapiens est

₃₆sine his omnibus non aedificatur civitas

₃₇et non inhabitabunt nec inambulabunt

et in ecclesiam non transilient

₃₈super sellam iudicis non sedebunt

et testamentum iudicii non intellegent

neque palam facient disciplinam et iudicium

et in parabolis non invenientur

₃₉sed creaturam aevi confirmabunt

et deprecatio illorum in operatione artis

adcommodantes animam suam et conquirentes in lege Altissimi