LIBER IESU FILII SIRACH 37

₁omnis amicus dicet et ego amicitiam copulavi

sed est amicus solo nomine amicus

nonne tristitia inest usque ad mortem

₂sodalis autem et amicus ad inimicitiam convertentur

₃o praesumptio nequissima unde creata es

cooperire aridam malitiam et dolositatem illius

₄sodalis amico coniucundatur in oblectatione

et in tempore tribulationis adversarius erit

₅sodalis amico condolet causa ventris

et contra hostem accipiet scutum

₆non obliviscaris amici tui in animo tuo

et non inmemor sis illius in operibus tuis

₇noli consiliari cum socero tuo

et a zelantibus te absconde consilium

₈omnis consiliarius prodit consilium

sed est consiliarius in semet ipso

₉a consiliario serva animam tuam

prius scito quae sit illius necessitas

et ipse enim animo suo cogitabit

₁₀ne forte mittat sudem in terram et dicat tibi

₁₁bona est via tua

et stet e contrario videre quid tibi eveniat

₁₂cum viro inreligioso tracta de sanctitate

et cum iniusto de iustitia

et cum muliere de ea quae aemulatur

cum timido de bello

cum negotiatore de traiecticio

cum emptore de venditione

cum viro livido de gratiis agendis

₁₃cum impio de pietate

cum inhonesto de honestate

cum operario agri de

omni opere

₁₄cum operario annuali de consummatione anni

cum servo pigro de multa operatione

non adtendas his in omni consilio

₁₅cum viro sancto adsiduus esto

quemcumque cognoveris observantem timorem Dei

₁₆cuius anima est secundum animam tuam

quicumque titubaverit

in tenebris non condolebit tibi

₁₇et cor boni consilii statue

non est enim tibi aliud pluris

illo

₁₈anima viri sancti enuntiat aliquando vera

quam septem circumspectores

sedentes ad speculandum

₁₉et in his omnibus deprecare Altissimum

ut dirigat in veritate viam tuam

₂₀ante omnem operam verbum verax

praecedat te

et ante omnem actum consilium stabile

₂₁verbum nequa inmutabit cor

quattuor partes oriuntur

bonum et malum vita et mors

et dominatrix illorum est adsidua lingua

₂₂vir peritus multos erudivit

et animae suae suavis est

₂₃qui sofistice loquitur odibilis est

omni re defraudabitur

₂₄non est enim data illi a

Domino gratia

omni enim sapientia defraudatus est

₂₅est sapiens animae suae sapiens

et fructus sensus illius laudabilis

₂₆vir sapiens plebem suam erudit

et fructus sensus eius fideles sunt

₂₇vir sapiens implebitur benedictione

et videntes illum laudabunt

₂₈vita viri in numero dierum

dies autem Israhel innumerabiles sunt

₂₉sapiens in populo hereditabit honorem

et nomen illius erit vivens in aeternum

₃₀fili in vita tua tempta animam tuam

et si fuerit nequam non des illi potestatem

₃₁non enim omnia omnibus expediunt

et non omni animae omne genus placet

₃₂noli avidus esse in omni epulatione

et non te effundas super omnem escam

₃₃in multis enim escis erit infirmitas

et aplestia adpropinquabit usque ad cholera

₃₄propter aplestiam multi

obierunt

qui autem abstinens est adiciet vitam