LIBER IESU FILII SIRACH 36

₁miserere nostri Deus omnium et respice nos

et ostende nobis lucem miserationum tuarum

₂et inmitte timorem tuum super gentes quae non exquisierunt te

et cognoscant quia non est Deus nisi tu

ut enarrent magnalia tua

₃adleva manum tuam super gentes alienas ut videant potentiam tuam

₄sicut enim in conspectu eorum sanctificatus es in nobis

sic in conspectu nostro magnificaberis in illis

₅ut cognoscant te sicut et nos agnovimus

quoniam non est Deus praeter te Domine

₆innova signa et inmuta mirabilia

₇glorifica manum et brachium dextrum

₈excita furorem et effunde iram

₉extolle adversarium et adflige inimicum

₁₀festina tempus et memento finis ut enarrent mirabilia tua

₁₁in ira flammae devoretur qui salvatur

et qui pessimant plebem tuam inveniant perditionem

₁₂contere caput principum inimicorum

dicentium non est alius praeter nos

₁₃congrega omnes tribus Iacob

et cognoscant quia non est Deus nisi tu

ut enarrent magnalia tua

et hereditabis eos sicut ab initio

₁₄miserere plebi tuae

super quam invocatum est nomen tuum

et Israhel quem coaequasti primogenito tuo

₁₅miserere civitati sanctificationis tuae

Hierusalem civitati requiei tuae

₁₆reple Sion inenarrabilibus verbis tuis et gloria tua populum tuum

₁₇da testimonium quia ab initio creaturae tuae sunt

et suscita precationes

quas locuti sunt in nomine tuo prophetae priores

₁₈da mercedem sustinentibus te ut prophetae tui fideles inveniantur

et exaudi orationes servorum tuorum

₁₉secundum benedictionem Aaron de populo tuo

et dirige nos in via iustitiae

et sciant omnes qui inhabitant terram

quia tu es Deus conspector saeculorum

₂₀omnem escam manducabit venter

et est cibus cibo melior

₂₁fauces contingit cibum ferae

et cor sensatum verba mendacia

₂₂cor pravum dabit tristitiam

et homo peritus resistet illi

₂₃omnem masculum excipiet mulier et est filia melior filiae

₂₄species mulieris exhilarat faciem viri sui

et super omnem concupiscentiam hominis superducit

desiderium

₂₅si est lingua curationis et mitigationis

misericordiae

non est vir illius contra filios hominum

₂₆qui possidet mulierem inchoat possessionem

adiutorium contra illum est et columna ut requies

₂₇ubi non est sepis diripietur possessio

et ubi non est mulier gemescit egens

₂₈cui credit qui non habet

nidum

et deflectens ubicumque obscuraverit

quasi succinctus latro exiliens de civitate in civitatem