LIBER IESU FILII SIRACH 35

₁qui conservat legem multiplicat orationem

₂sacrificium salutare adtendere mandatis

et discedere ab omni iniquitate

₃et deprecatio recedere ab iniustitia

₆non apparebis ante conspectum Dei vacuus

₇haec enim omnia propter mandatum Domini fiunt

₈oblatio iusti inpinguat altare

et odor suavitatis est in conspectu Altissimi

₉sacrificium iusti acceptum est

et memoriam eius non obliviscetur Dominus

₁₀bono animo gloriam redde Deo

et non minuas primitias manuum tuarum

₁₁in omni dato hilarem fac vultum tuum

et in exultatione sanctifica decimas tuas

₁₂da Altissimo secundum datum eius

et in bono oculo ad inventionem fac manuum tuarum

₁₃quoniam Dominus retribuens est

et septies tantum reddet tibi

₁₄noli offerre munera prava non enim suscipiet illa

₁₅et noli inspicere sacrificium iniustum

quoniam Dominus iudex est

et non est apud illum gloria personae

₁₆non accipiet Dominus personam in pauperem

et precationem laesi exaudiet

₁₇non despiciet preces pupilli

nec viduam si effundat loquellam gemitus

₁₈nonne lacrima ad maxillam descendit

et exclamatio

₁₉a maxilla ascendit

et Dominus exauditor delectans in

illis

₂₀qui adorat Deum in oblectatione suscipietur

et precatio illius usque ad nubes

propinquabit

₂₁oratio humiliantis se nubes penetrabit

et donec propinquet non conrogabitur

et non discedet donec aspiciat Altissimus

₂₂et Dominus non longinquabit

sed iudicabit iustos et faciet iudicium

et Fortissimus non habebit in illis patientiam

ut contribulet dorsum ipsorum

₂₃et gentibus reddet vindictam

donec tollat plenitudinem superborum

et sceptra iniquorum contribulet

₂₄donec reddat hominibus secundum actus suos

et secundum opera Adae et secundum praesumptionem illius

₂₅donec iudicet iudicium plebis suae

et oblectabit iustos misericordia sua

₂₆speciosa misericordia Dei in tempore tribulationis

quasi nubes pluviae in tempore siccitatis