LIBER IESU FILII SIRACH 34

₁vana spes et mendacium insensato viro

et somnia extollunt inprudentes

₂quasi qui adprehendit umbram et persequitur ventum

sic et qui adtendit ad visa mendacia

₃hoc secundum hoc visio somniorum

ante faciem hominis similitudo hominis

₄ab inmundo quid mundabitur et a mendace quid verum dicetur

₅divinatio erroris et auguria mendacia

et somnia malefacientium vanitas est

₆et sicut parturientis cor tuum fantasiam patitur

nisi ab Altissimo fuerit emissa visitatio

ne dederis in illis cor tuum

₇multos enim errare fecerunt somnia

et exciderunt sperantes in illis

₈sine mendacio consummabitur verbum

et sapientia in ore fidelis conplanabitur

₉qui non temptatus est quid scit

vir in multis expertus cogitavit multa

et qui multa didicit enarrabit intellectum

₁₀qui non est expertus pauca recognoscit

qui autem in multis factus est multiplicabit

malitiam

₁₂multa vidi errando

et plurimas verborum consuetudines

₁₃aliquotiens usque ad mortem periclitatus sum horum causa

et liberatus sum gratia Dei

₁₄spiritus timentium Deum quaeretur

et in respectu illius benedicentur

₁₅spes enim illorum in salvantem illos et oculi Dei in diligentes se

₁₆qui timet Dominum nihil trepidabit

et non pavebit quoniam ipse est spes eius

₁₇timentis Dominum beata est anima eius

₁₈ad quem respicit et quis est fortitudo eius

₁₉oculi Domini super timentes eum

protector potentiae firmamentum virtutis

tegimen ardoris et umbraculum meridiani

₂₀et precatio offensionis

et adiutorium casus

exaltans animam et inluminans oculos

dans sanitatem vitam et benedictionem

₂₁immolans ex iniquo oblatio est maculata

et non sunt beneplacitae subsannationes iniustorum

₂₂Dominus solus sustinentibus se in via veritatis et iustitiae

₂₃dona iniquorum non probat Altissimus

in oblationibus

iniquorum

nec in multitudine sacrificiorum eorum propitiabitur peccatis

₂₄qui offert sacrificium ex substantia pauperum

quasi qui victimat filium in conspectu patris sui

₂₅panis egentium vita pauperis est

qui defraudat illum homo sanguinis

₂₆qui aufert in sudore panem quasi qui occidit proximum suum

₂₇qui effundit sanguinem

et qui fraudem facit mercedem mercennario

₂₈unus aedificans et unus destruens quid prodest illis nisi labor

₂₉unus orans et unus maledicens cuius vocem exaudiet Deus

₃₀qui baptizatur a mortuo et iterum tangit illum

quid proficit lavatione illius

₃₁sic homo qui ieiunat in peccatis suis et iterum eadem faciens

quid proficit humiliando se

orationem illius quis exaudiet