LIBER IESU FILII SIRACH 32

₁rectorem te posuerunt noli extolli

esto in illis quasi unus ex ipsis

₂curam illorum habe et sic conside

et omni cura tua explicita recumbe

₃ut laeteris propter illos

et ornamentum gratiae accipias coronam

et dignationem consequaris conrogationis

₄loquere maior natu decet enim te

₅primum verbum diligenti scientiam

et non inpedias musica

₆ubi auditus est non effundas sermonem

et inportune noli extolli in sapientia tua

₇gemmula carbunculi in ornamento auri

et conparatio musicorum in convivio vini

₈sicut in fabricatione auri signum est zmaragdi

sic numerus musicorum in iucundo et moderato vino

₉audi tacens et pro reverentia accedet tibi bona gratia

₁₀adulescens loquere in tua causa vix

₁₁si bis interrogatus fueris habeat caput responsum tuum

₁₂in multis esto quasi inscius et audi tacens simul et quaerens

₁₃in medio magnatorum non praesumas

et ubi sunt senes non multum loquaris

₁₄ante grandinem praeibit coruscatio

et pro reverentia accedet tibi bona

gratia

₁₅et hora surgendi non te trices

praecurre autem prior in domum tuam et illic avocare

et illic lude

₁₆et age conceptiones tuas

et non in delictis et verbo superbo

₁₇et super his omnibus benedicito Dominum qui fecit te

et inebriantem te ab omnibus bonis suis

₁₈qui timet Deum excipiet doctrinam eius

et qui vigilaverint ad illum invenient benedictionem

₁₉qui quaerit legem replebitur ab ea

et qui insidiose agit scandalizabitur in ea

₂₀qui timent Dominum invenient iudicium iustum

et iustitias quasi lucem accendent

₂₁peccator homo devitabit correptionem

et secundum voluntatem suam inveniet conparationem

₂₂vir consilii non disperiet intellegentia

alienus et superbus non pertimescit timorem

₂₃etiam postquam fecit cum eo sine consilio

et suis insectationibus arguetur

₂₄fili sine consilio nihil facias

et post factum non paeniteberis

₂₅in via ruinae non eas et non offendes in lapides

ne credas te viae laboriosae

ne ponas animae tuae scandalum

₂₆et a filiis tuis cave et a domesticis tuis adtende

₂₇in omni opere crede ex fide animae tuae

haec est enim conservatio mandatorum

₂₈qui credit Deo adtendit mandatis

et qui confident in illo non

minorabuntur