LIBER IESU FILII SIRACH 31

₁vigilia honestatis tabefacit carnes

et cogitatus illius auferet somnum

₂cogitatus praesentiae avertit sensum

et infirmitas gravis sobriam facit animam

₃laboravit dives in congregatione substantiae

et in requie sua replebitur bonorum suorum

₄laboravit pauper in diminutione victus

et in fine inops fit

₅qui aurum diligit non iustificabitur

et qui insequitur consumptionem replebitur ex ea

₆multi dati sunt in auri casus

et facta est in facie ipsius perditio illorum

₇lignum offensionis est aurum sacrificantium

vae illis qui sectantur illud et omnis inprudens deperiet in illo

₈beatus dives qui inventus est sine macula

et qui post aurum non abiit

nec speravit in pecunia et thesauris

₉quis est hic et laudabimus eum fecit enim mirabilia in vita sua

₁₀quis probatus est in illo et perfectus est

et erit illi in gloria aeterna

qui potuit transgredi et non est transgressus

et facere mala et non fecit

₁₁ideo stabilita sunt bona illius in Deo

et elemosynas illius enarrabit ecclesia

sanctorum

₁₂de continentia

Supra mensam magnam sedisti

non aperias super illam faucem tuam prior

₁₃non dicas simulata sunt quae

super illa sunt

₁₄memento quoniam malum oculus nequa

₁₅nequius oculo quid creatum est

ideo ab omni facie sua lacrimabitur cum viderit

₁₆ne extendas manum tuam prior

et invidia contaminatus obrubescas

₁₇nec conprimaris in convivio

₁₈intellege proximi tui ex te

ipso

₁₉utere quasi homo frugi quae tibi adponuntur

et non cum manducas multum odio habearis

₂₀cessa prior causa disciplinae et noli nimius esse ne forte offendas

₂₁et si in medio multorum sedisti

prior illis non extendas manum tuam

nec prior poscas bibere

₂₂quam sufficiens est homini erudito vinum exiguum

et in dormiendo non laborabis ab illo et non senties dolorem

₂₃vigilia et cholera et tortura viro infrunito

₂₄somnus sanitatis in homine parco

dormiet usque in mane et anima illius cum ipso delectabitur

₂₅et si coactus fueris in edendo multum

surge e medio et vome et refrigerabit te

et non adduces corpori tuo infirmitates

₂₆audi me fili et ne spernas me

et in novissimo invenies mea verba

₂₇in omnibus operibus tuis esto velox

et omnis infirmitas non occurret tibi

₂₈splendidum in panibus benedicent labia multorum

et testimonium veritatis illius fidele

₂₉in nequissimo pane murmurabit civitas

et testimonium nequitiae illius verum est

₃₀diligentes in vino noli provocare

multos enim exterminavit vinum

₃₁ignis probat ferrum durum

sic vinum corda superborum arguet in ebrietate potatum

₃₂aequavit in vita

vinum hominibus

si bibas illud moderate eris sobrius

₃₃quae est vita quae minuitur vino

₃₄quid defraudat vitam mors

₃₅vinum in iucunditate creatum est

non in ebrietate ab initio

₃₆exultatio animae et cordis vinum moderate potatum

₃₇sanitas est et corpori et animae

₃₈vinum multum potatum inritationem et iram et ruinas multas facit

₃₉amaritudo animae vinum multum potatum

₄₀ebrietatis animositas inprudentis offensio

minorans virtutem et faciens vulnera

₄₁in convivio vini non arguas proximum

et non despicias eum in iucunditate illius

₄₂verba inproperii non dicas illi

et non premas illum in repetendo