LIBER IESU FILII SIRACH 30

₁de filiis

Qui diligit filium suum adsiduat illi flagella

ut laetetur in novissimo suo

₂qui docet filium suum laudabitur in illo

et in medio domesticorum in illo gloriabitur

₃qui docet filium suum in zelum mittit inimicum

et in medio amicorum gloriabitur in illo

₄mortuus est pater illius et quasi non est mortuus

similem enim reliquit sibi post se

₅in vita ipsius vidit et laetatus est in illo

in obitu illius non est contristatus

nec confusus est coram inimicis

₆reliquit enim defensorem domus

et amicis reddentem gratiam

₇pro animabus filiorum conligabit vulnera sua

et super omnem vocem turbabuntur viscera eius

₈equus indomitus evadit durus

et filius remissus evadit praeceps

₉lacta filium et paventem te faciet

lude cum eo et contristabit te

₁₀non conrideas illi ne doleas

et in novissimo obstupescent dentes tui

₁₁non des illi potestatem in iuventute et ne despicias cogitatus illius

₁₂curva cervicem eius in iuventute

et tunde latera illius dum infans est

ne forte induret et non credat tibi et erit tibi dolor animae

₁₃doce filium tuum et operare in illum

ne in turpitudinem illius offendas

₁₄melior est pauper sanus et fortis viribus

quam dives inbecillis et flagellatus malitia

₁₅salus animae in sanctitate iustitiae

et melior omni auro et argento

et corpus validum quam census inmensus

₁₆non est census super censum salutis corporis

et non est oblectatio super cordis gaudium

₁₇melior est mors quam vita amara

et requies aeterna quam languor perseverans

₁₈bona absconsa in ore cluso

quasi adpositiones epularum circumpositae sepulchro

₁₉quid proderit libatio idolo

nec enim manducat nec odorabitur

₂₀sic qui effugatur a Domino et portans mercedes iniquitatis

₂₁videns oculis et ingemescens

sicut spado conplectens virginem et suspirans

₂₂tristitiam non des animae tuae

et non adfligas temet ipsum in consilio tuo

₂₃iucunditas cordis haec est vita hominis

et thesaurus sine defectione sanctitatis

et exultatio viri est longevitas

₂₄miserere animae tuae placens Deo

et contine et congrega cor tuum in sanctitate eius

et tristitiam longe expelle a te

₂₅multos enim occidit tristitia et non est utilitas in illa

₂₆zelus et iracundia minuit dies

et ante tempus senectam adducit cogitatus

₂₇splendidum cor bonum in epulis

epulae enim illius diligenter fiunt