LIBER IESU FILII SIRACH 29

₁de fenore

Qui facit misericordiam fenerat proximum

et qui praevalet manu mandata servat

₂fenera proximum tibi in tempore necessitatis illius

et iterum redde proximo in tempore suo

₃confirma verbum et fideliter age cum illo

et in omni tempore invenies quod tibi necessarium est

₄multi quasi inventionem aestimaverunt fenus

et praestiterunt molestiam his qui se adiuvaverunt

₅donec accipiant osculantur manum dantis

et in promissionibus humiliant vocem suam

₆et in tempore redditionis postulabit tempus

et loquetur verba acediae et murmurationum

et tempus causabitur

₇si autem potuerit reddere

aversatus

solide vix reddet dimidium

et conputabit illud quasi inventionem

₈sin autem fraudavit illum pecunia sua

et possidebit illum inimicum gratis

₉et convicia et maledicta reddet illi

et pro honore et beneficio reddet illi contumeliam

₁₀multi non causa nequitiae non feneraverunt

sed fraudari gratis timuerunt

₁₁verumtamen super humilem animo fortior esto

et pro elemosyna non trahas illum

₁₂propter mandatum adsume pauperem

et propter inopiam eius ne dimittas illum vacuum

₁₃perde pecuniam pro fratre et amico

et non abscondas illam sub lapide in perditionem

₁₄pone thesaurum tuum in praeceptis Altissimi

et proderit tibi magis quam aurum

₁₅conclude elemosynam in corde pauperis

et haec pro te exorabit ab omni malo

₁₈super scutum potentis et super lanceam

adversus inimicum tuum pugnabit

₁₉vir bonus fidem facit proximo suo

et qui perdiderit confusionem derelinquet sibi

₂₀gratiam fideiussoris ne obliviscaris

dedit enim pro te animam suam

₂₁repromissorem fugit peccator et inmundus

₂₂bona repromissoris sibi adscribit peccator

et ingratus sensu derelinquet liberantem se

₂₃vir repromittit de proximo suo

et cum perdiderit reverentiam relinquetur ab eo

₂₄repromissio nequissima multos perdidit dirigentes

et commovit illos quasi fluctus maris

₂₅viros potentes gyrans migrare fecit

et vagati sunt in gentibus alienis

₂₆peccator transgrediens mandata Domini

incidet in promissionem nequa

et qui conatur multa agere incidet in iudicium

₂₇recupera proximum secundum virtutem tuam

et adtende tibi ne incidas

₂₈initium vitae aqua et panis et

vestimentum

et domus protegens turpitudinem

₂₉melior victus pauperis sub tegimen asserum

quam epulae splendidae in peregre sine domicilio

₃₀super minimum et magnum placeat tibi

et inproperium peregrinationis non audies

₃₁vita nequa hospitandi de domo in domum

et ubi hospitabitur non fiducialiter aget nec aperiet os

₃₂hospitabit et pascet et potabit ingratos

et ad haec amara audiet

₃₃transi hospes et orna mensam

et quae in manu habes ciba ceteros

₃₄exi a facie honoris amicorum meorum

necessitudine domus meae hospitio

mihi factus est frater

₃₅gravia haec homini habenti sensum

correptio domus et inproperium feneratoris