LIBER IESU FILII SIRACH 28

₁qui vindicari vult a Deo inveniet vindictam

et peccata illius servans servabit

₂relinque proximo tuo nocenti te

et tunc deprecanti tibi peccata solventur

₃homo homini servat iram

et a Deo quaerit medellam

₄et in hominem similem sibi non habet

misericordiam

et de peccatis suis deprecatur

₅ipse dum caro sit reservat iram

et propitiationem petit a Deo

quis exorabit pro delictis illius

₆memento novissimorum et desine inimicari

₇tabitudo enim et mors inminet in mandatis

₈memorare timorem Dei et non irascaris proximo

₉memorare testamenti Altissimi

et despice ignorantiam proximi

₁₀abstine te a lite et minues peccata

₁₁homo enim iracundus incendit litem et vir peccator turbabit amicos

et in medium pacem habentium inmittit

inimicitiam

₁₂secundum enim ligna silvae sic ignis exardescit

et secundum virtutem hominis iracundia illius erit

et secundum substantiam suam exaltabit iram suam

₁₃certamen festinatum incendit ignem

et lis festinans effundit sanguinem

et lingua testificans adducit mortem

₁₄si sufflaveris quasi ignis exardebit

et si expueris super illam extinguetur

utraque ex ore proficiscuntur

₁₅susurrio et bilinguis maledictus

multos enim turbavit pacem habentes

₁₆lingua tertia multos commovit

et dispersit illos a gente in gentem

₁₇civitates muratas divitum destruxit et domos magnatorum effodit

₁₈virtutes populorum concidit et gentes fortes dissolvit

₁₉lingua tertia mulieres viritas eiecit

et privavit illas laboribus suis

₂₀qui respicit illam non habebit requiem

nec habitabit cum requie

₂₁flagelli plaga livorem facit plaga autem linguae comminuet ossa

₂₂multi ceciderunt in ore gladii

sed non sic quasi qui interierunt per linguam suam

₂₃beatus qui tectus est a lingua nequa

qui in iracundia illius non transivit

et qui non adtraxit iugum eius

et in vinculis illius non est ligatus

₂₄iugum enim illius iugum ferreum est

et vinculum illius vinculum aereum est

₂₅mors illius mors nequissima

et utilis potius inferus quam illa

₂₆perseverantia illius non permanebit

sed obtinebit vias iniustorum et in flamma sua non conburet iustos

₂₇qui derelinquunt Deum incident

in illam

et exardebit in illis et non extinguetur

et inmittetur in illos quasi leo

et quasi pardus laedebit illos

₂₈sepi aures tuas spinis et noli audire linguam nequam

et ori tuo facito ostia et seras

₂₉aurum tuum et argentum confla

et verbis tuis facito stateram et frenos ori tuo rectos

₃₀et adtende ne forte labaris in lingua

et cadas in conspectu inimicorum insidiantium tibi

et sit casus tuus insanabilis in mortem