LIBER IESU FILII SIRACH 27

₁propter inopiam multi deliquerunt

et qui quaerit locupletari avertit oculum suum

₂si in medio conpaginis lapidum palus figitur

sic et inter medium venditionis et emptionis angustabitur peccatis

₃conteretur delictum

₄si non in timore Domini tenueris instanter

cito subvertetur domus tua

₅si in pertusura cribri remanebit stercus

sic aporia hominis in cogitatu illius

₆vasa figuli probat fornax

et homines iustos temptatio tribulationis

₇sicut rusticatio de ligno ostendit fructum illius

sic verbum excogitatum

hominis cordis

₈ante sermonem non conlaudes virum

haec enim temptatio est hominum

₉si sequaris iustitiam adprehendes illam

et indues quasi poderem honoris

et inhabitabis cum ea et proteget te in sempiternum

et in die agnitionis invenies firmamentum

₁₀volatilia ad sibi similia conveniunt

et veritas ad eos qui operantur illam revertetur

₁₁leo venationi insidiatur semper

sic peccata operantibus iniquitates

₁₂homo sanctus in sapientia manet sicut sol

nam stultus sicut luna inmutatur

₁₃in medio insensatorum serva verbum tempori

in medio autem cogitantium adsiduus esto

₁₄narratio peccantium odiosa

et risus illorum delictis peccati

₁₅loquella multum iurans horripilationem capiti

statuet

et inreverentia ipsius obturatio aurium

₁₆effusio sanguinis in rixa superborum

et maledictio illorum auditus gravis

₁₇qui denudat arcana amici perdet fidem

et non inveniet amicum ad animum suum

₁₈dilige proximum et coniungere fide cum illo

₁₉quod si denudaveris absconsa illius non persequeris post eum

₂₀sicut enim homo qui perdit amicum suum

sic qui perdit amicitiam proximi sui

₂₁et sicut qui dimittit avem de manu sua

sic reliquisti proximum tuum et non eum capies

₂₂non illum sequaris quoniam longe abest

effugit enim quasi caprea de laqueo

quoniam vulnerata est

₂₃conligare et maledicti est concordatio

₂₄denudare autem amici mysteria desperatio est

₂₅annuens oculo fabricat iniqua et nemo eum abiciet

₂₆in conspectu oculorum tuorum condulcabit os tuum

et super sermones tuos admirabitur

novissime autem pervertet os suum

et in verbis tuis dabit scandalum

₂₇multa audivi et non coaequavi ei

et Dominus odiet illum

₂₈qui in altum mittit lapidem super caput eius cadet

et plaga dolosi dividet vulnera

₂₉et qui foveam fodit in illam decidet

et qui statuit lapidem proximo offendet in eo

et qui laqueum alio peribit in illo

₃₀facienti nequissimum super ipsum devolvetur

et non agnoscet unde adveniat illi

₃₁inlusio et inproperium superborum

et vindicta sicut leo insidiabitur illi

₃₂laqueo peribunt qui oblectantur casu iustorum

dolor autem consumet illos antequam moriantur

₃₃ira et furor utraque execrabilia

et vir peccator continens erit illorum