LIBER IESU FILII SIRACH 24

₁sapientiae laus

Sapientia laudabit animam suam et in Deo honorabitur

et in medio populi sui gloriabitur

₂et in ecclesiis Altissimi aperiet os suum

et in conspectu virtutis illius gloriabitur

₃in medio populo exaltabitur

et in plenitudine sancta admirabitur

₄in multitudine electorum habebit laudem

et inter benedictos benedicetur dicens

₅ego ex ore Altissimi prodivi primogenita ante omnem creaturam

₆ego in caelis feci ut oriretur lumen indeficiens

et sicut nebula texi omnem terram

₇ego in altis habitavi

et thronus meus in columna nubis

₈gyrum caeli circuivi sola

et in profundum abyssi penetravi

et in fluctibus maris ambulavi

₉et in omni terra steti

et in omni populo

₁₀et in omni gente primatum habui

₁₁et omnium excellentium et humilium corda virtute calcavi

et in his omnibus requiem quaesivi

et in hereditate eius morabor

₁₂tunc praecepit et dixit mihi creator omnium

et qui creavit me requievit in tabernaculo meo

₁₃et dixit mihi in Iacob inhabita

et in Israhel hereditare

et in electis meis ede radices

₁₄ab initio ante saeculum creata sum

et usque ad futurum saeculum non desinam

et in habitatione sancta coram ipso ministravi

₁₅et sic in Sion firmata sum

et in civitate sanctificata similiter requievi

et in Hierusalem potestas mea

₁₆et radicavi in populo honorificato

et in parte Dei mei hereditas illius

et in plenitudine sanctorum detentio mea

₁₇quasi cedrus exaltata sum in Libano

et quasi cypressus in monte Sion

₁₈et quasi palma exaltata sum in Cades

et quasi plantatio rosae in Hiericho

₁₉quasi oliva speciosa in campis

et quasi platanus exaltata sum iuxta aquam in plateis

₂₀sicut cinnamomum et aspaltum aromatizans odorem dedi

quasi murra electa dedi suavitatem odoris

₂₁et quasi storax et galbanus et ungula et gutta

et quasi libanus non incisus vaporavi habitationem meam

et quasi balsamum non mixtum odor meus

₂₂ego quasi terebinthus extendi ramos meos

et rami mei honoris et gratiae

₂₃ego quasi vitis fructificavi suavitatem odoris

et flores mei fructus honoris et honestatis

₂₄ego mater pulchrae dilectionis et timoris et agnitionis et sanctae spei

₂₅in me gratia omnis vitae et veritatis

in me omnis spes vitae et virtutis

₂₆transite ad me omnes qui concupiscitis me

et a generationibus meis implemini

₂₇spiritus enim meus super melle dulcis

et hereditas mea super mel et favum

₂₈memoria mea in generatione saeculorum

₂₉qui edunt me adhuc esurient et qui bibunt me adhuc sitient

₃₀qui audit me non confundetur

et qui operantur in me non peccabunt

₃₁qui elucidant me vitam aeternam habebunt

₃₂haec omnia liber vitae

testamentum Altissimi et agnitio veritatis

₃₃legem mandavit Moses in praeceptis iustitiarum

et hereditatem domui Iacob et Israhel promissionis

₃₄posuit David puero suo excitare regem ex ipso fortissimum

in throno honoris sedentem in sempiternum

₃₅qui implet quasi Phison sapientiam

et sicut Tigris in diebus novorum

₃₆qui adimplet quasi Eufrates sensum

qui multiplicat quasi Iordanis in tempore messis

₃₇qui mittit disciplinam sicut lucem

et adsistens quasi Geon in die vindemiae

₃₈qui perficit primus scire ipsam

et infirmior non investigavit eam

₃₉a mari enim abundavit cogitatio eius

et consilium illius abysso magna

₄₀ego sapientia effudi flumina

₄₁ego quasi tramis aquae inmensae de fluvio

ego quasi fluvius Doryx

et sicut aquaeductus exivi a paradiso

₄₂dixi rigabo meum hortum plantationum

et inebriabo pratus mei fructum

₄₃et ecce facta est mihi tramis abundans

et fluvius meus propinquavit ad mare

₄₄quoniam doctrinam quasi antelucanum inlumino omnibus

et enarrabo illam usque in longinquo

₄₅penetrabo inferiores partes terrae

et inspiciam omnes dormientes

et inluminabo sperantes in Deo

₄₆adhuc doctrinam quasi prophetiam effundam

et relinquam illam quaerentibus sapientiam

et non desinam in progenies illorum usque in aevum sanctum

₄₇videte quoniam non soli mihi laboravi

sed omnibus exquirentibus veritatem