LIBER IESU FILII SIRACH 23

₁Domine pater et dominator vitae meae

non relinquas me

ne sinas me cadere in illis

₂quis superponet in me in cogitatu meo

flagella

et in corde meo doctrinam sapientiae

ut ignorationibus eorum non parcant mihi

et non pareant delicta illorum

₃et adincrescant ignorantiae meae

et multiplicentur delicta mea et peccata mea abundent

et incidam in conspectu adversariorum

et gaudeat inimicus meus

₄Domine pater et Deus vitae meae

ne derelinquas me in cogitatu illorum

₅extollentiam oculorum meorum ne dederis mihi

et omne desiderium averte a me

₆aufer a me ventris concupiscentias

et concubitus concupiscentiae ne adprehendant me

et animae inreverenti et infrunitae ne tradas me

₇doctrina oris

Doctrinam oris audite filii

et qui custodierit illam non periet in labiis suis

nec scandalizabitur in operibus nequissimis

₈in vanitate sua adprehendetur peccator et superbus

et maledicus scandalizabitur in illo

₉iurationi non adsuescat os tuum

multus enim casus in illa

₁₀nominatio vero Dei non sit adsidua in ore tuo

et nominibus sanctorum non admiscearis

quoniam non eris inmunis ab eis

₁₁sicut enim servus interrogatus adsidue

a livore non minuetur

sic omnis iurans et nominans in toto a peccato non purgabitur

₁₂vir multum iurans implebitur iniquitate

et non discedet a domo illius plaga

₁₃et si frustraverit delictum ipsius super ipsum

erit

et si dissimulaverit delinquet dupliciter

₁₄et si in vacuum iuraverit non iustificabitur

replebitur enim retributione domus illius

₁₅est et alia loquella contraria morti

non inveniatur in hereditate Iacob

₁₆etenim a misericordibus omnia haec auferentur

et in delictis non volutabunt

₁₇indisciplinose non adsuescat os tuum

est enim in illa verbum peccati

₁₈memento patris et matris tuae

in medio enim magnatorum consistis

₁₉ne forte obliviscatur te in conspectu illorum

et adsiduitate tua infatuatus inproperium patiaris

et maluisses non nasci

et diem nativitatis tuae maledicas

₂₀homo adsuetus in verbis inproperii

in omnibus diebus suis non erudietur

₂₁duo genera abundant in peccatis

et tertium adducit iram et perditionem

₂₂anima calida quasi ignis ardens

non extinguetur donec aliquid gluttiat

₂₃et homo nequam in ore carnis suae

non desinet donec incendat ignem

₂₄homini fornicario omnis panis dulcis

non cessabit transgrediens

a lecto suo

₂₅omnis homo qui transgreditur lectum suum

contemnens in animam suam et dicens quis me videt

₂₆tenebrae circumdant me

et parietes cooperiunt me

et nemo circumspicit me quem vereor

delictorum meorum non memorabitur Altissimus

₂₇et non intelleget

quoniam omnia videt oculus illius

quoniam expellit a se timorem Dei huiusmodi hominis timor

et oculi hominum timentes illum

₂₈et non cognovit

quoniam oculi Domini multo plus lucidiores super solem

circumspicientes omnes vias hominum

et profundum abyssi et hominum corda intuentes in absconsas

partes

₂₉Domino enim Deo antequam crearentur omnia sunt agnita

sic et post perfectum respicit omnia

₃₀hic in plateis civitatis vindicabitur

quasi pullus equinus fugabitur

et ubi non speravit adprehendetur

₃₁et erit dedecus omnibus

quod non intellexerit timorem Dei

₃₂sic et mulier omnis relinquens virum suum

et statuens hereditatem ex alieno matrimonio

₃₃primo enim in lege Altissimi incredibilis fuit

et secundo virum suum dereliquit

tertio in adulterio fornicata est et ex alio viro filios statuit sibi

₃₄haec in ecclesiam adducetur

et in filios eius respicietur

₃₅non tradent filii eius radices et rami eius non dabunt fructum

₃₆derelinquent in maledictum memoriam illius

et dedecus illius non delebitur

₃₇et agnoscent qui derelicti sunt

quoniam nihil melius quam timor Dei

et nihil dulcius quam respicere in mandatis Domini

₃₈et gloria magna est sequi Dominum

longitudo enim dierum adsumetur ab eo