LIBER IESU FILII SIRACH 25

₁in tribus placitum est spiritui meo

quae sunt probata coram Deo et hominibus

₂concordia fratrum et amor proximorum

et vir et mulier sibi consentientes

₃tres species odivit anima mea et adgravor valde animae illorum

₄pauperem superbum et divitem mendacem

et senem fatuum et insensatum

₅in iuventute tua non congregasti

et quomodo invenies eam in senectute

tua

₆quam speciosum canitiae iudicium

et presbyteris cognoscere consilium

₇quam speciosa veteranis sapientia

et gloriosis intellectus et consilium

₈corona senum multa peritia

et gloria illorum timor Dei

₉novem insuspicabilia cordis magnificavi

et decimum dicam in lingua hominibus

₁₀homo qui iucundatur in filiis

vivens et videns subversionem inimicorum

₁₁beatus qui inhabitat cum muliere sensata

et qui in lingua sua non est lapsus

et qui non servivit indignis se

₁₂beatus qui invenit amicum verum

et qui enarrat iustitiam auri audienti

₁₃quam magnus qui invenit sapientiam et scientiam

sed non est super timentem Deum

₁₄timor Dei super omnia superposuit

₁₅beatus cui donatum est habere timorem Dei

qui tenet illum cui adsimilabitur

₁₆timor Dei initium dilectionis eius

fidei autem initium adglutinandum est ei

₁₇omnis plaga tristitia cordis est

et omnis malitia nequitia mulieris est

₁₈et omnem plagam et non plagam videbit cordis

₁₉et omnem nequitiam et non nequitiam mulieris

₂₀et omnem obductum et non obductum odientium

₂₁et omnem vindictam et non vindictam inimicorum

₂₂non est caput nequius super caput colubri

₂₃et non est ira super iram inimici

commorari leoni et draconi placebit

quam habitare cum muliere nequa

₂₄nequitia mulieris inmutat faciem eius

et obcaecabit vultum suum tamquam ursus

et quasi saccum ostendit in medio proximorum eius

₂₅et audiens suspirabit modicum

₂₆brevis malitia super malitiam mulieris

sors peccatorum cadat super illam

₂₇ascensus harenosus in pedibus veterani

sic mulier linguata homini quieto

₂₈ne respicias in mulieris speciem

et non concupiscas mulierem in specie

₂₉mulieris ira et inreverentia et confusio magna

₃₀mulier si primatum habeat contraria est viro suo

₃₁cor humile et facies tristis

et plaga mortis mulier nequa

₃₂manus debiles et genua dissoluta

mulier quae non beatificat virum suum

₃₃a muliere initium factum est peccati et per illam omnes morimur

₃₄non des aquae tuae exitum nec modicum

nec mulieri nequa veniam prodeundi

₃₅si non ambulaverit ad manum tuam

et confundet te in conspectu inimicorum

₃₆a carnibus tuis abscide illam ne

semper te abutatur