LIBER IESU FILII SIRACH 2

₁fili accedens servituti Dei sta in iustitia et

timore

et praepara animam tuam ad temptationem

₂deprime cor tuum et sustine

declina aurem et excipe

verba intellectus

et ne festines in tempus obductionis

₃sustine sustentationes Dei

coniungere Deo et sustine ut crescat in novissimo vita tua

₄omne quod tibi adplicitum fuerit accipe

et in dolore sustine et in humilitate tua habe patientiam

₅quoniam in igne probatur aurum et argentum

homines vero receptibiles in camino humiliationis

₆crede Deo et recuperabit te

et dirige viam tuam et spera in illum

serva timorem illius et in illo veteresce

₇metuentes Deum sustinete misericordiam eius

et non deflectatis ab illo ne cadatis

₈qui timetis Deum credite illi

et non evacuabitur merces vestra

₉qui timetis Deum sperate in illum

et in oblectatione veniet vobis misericordia

₁₀qui timetis Deum diligite illum

et inluminabuntur corda vestra

₁₁respicite filii nationes hominum et scitote

quis speravit in Dominum et

confusus est

₁₂permansit in mandatis eius et derelictus est

et quis invocavit illum et despexit illum

₁₃quoniam pius et misericors Deus

et remittit in tempore tribulationis peccata

omnibus exquirentibus se in veritate

₁₄vae duplici corde et labiis scelestis et manibus malefacientibus

et peccatori terram ingredienti duabus viis

₁₅vae dissolutis corde qui non credunt Deo

ideo non protegentur ab eo

₁₆vae his qui perdiderunt sustinentiam

qui dereliquerunt vias rectas

et deverterunt in vias pravas

₁₇et quid facietis cum inspicere coeperit Deus

₁₈qui timent Dominum non erunt incredibiles verbo illius

et qui diligunt illum conservabunt viam illius

₁₉qui timent Dominum inquirent quae beneplacita sunt illi

et qui diligunt eum replebuntur lege ipsius

₂₀qui timent Dominum parabunt

corda sua

et in conspectu illius sanctificabunt animas suas

₂₁qui timent Dominum custodiunt mandata illius

et patientiam habebunt usque ad inspectionem illius

₂₂dicentes si paenitentiam non egerimus

incidemus in Dei manus

et non in manus hominum

₂₃secundum enim magnitudinem illius

sic et misericordia ipsius cum ipso