LIBER IESU FILII SIRACH 3

₁filii sapientiae ecclesia iustorum

et natio illorum obaudientia et dilectio

₂iudicium patris audite filii dilecti et sic facite ut salvi sitis

₃Deus enim honoravit patrem in filiis

et iudicium matris exquirens in

filios

₄qui diligit Deum exorabit pro peccatis

et continebit se ab illis

in oratione dierum exaudietur

₅et sicut qui thesaurizat ita et qui honorificat matrem suam

₆qui honorat patrem iucundabitur in filiis

₇qui honorat patrem suum vita vivet longiore

et qui obaudit patrem refrigerabit

matri

₈qui timet Deum honorat parentes

et quasi dominis serviet in his qui se

generaverunt

₉in opere et sermone et omni patientia

honora patrem tuum

₁₀ut superveniat tibi benedictio a Deo

et benedictio illius in novissimo manet

₁₁benedictio patris firmat domos filiorum

maledictio autem matris eradicat fundamenta

₁₂ne glorieris in contumelia patris tui

non est enim tibi gloria sed confusio

₁₃gloria enim hominis ex honore patris sui

et dedecus filiis pater sine honore

₁₄fili suscipe senectam patris tui

et ne contristes eum in vita illius

₁₅et si defecerit sensu veniam da

et ne spernas eum in tua virtute

elemosyna enim patris non erit in oblivione

₁₆nam pro peccato matris restituetur tibi bonum

₁₇et iniustitia aedificabitur tibi

in die tribulationis commemorabitur tui

sicut in sereno glacies solventur tua peccata

₁₈quam malae famae est qui relinquit patrem

et est maledictus a Deo qui exasperat matrem

₁₉fili in mansuetudine opera tua perfice

et super hominum gloriam diligeris

₂₀quanto magnus es humilia te in omnibus

et coram Deo invenies gratiam

₂₁quoniam magna potentia Dei solius

et ab humilibus honoratur

₂₂altiora te ne scrutaveris

et fortiora te ne exquisieris

sed quae praecepit tibi Deus illa cogita semper

et in pluribus operibus eius ne fueris curiosus

₂₃non est enim tibi necessarium

ea quae abscondita sunt videre oculis tuis

₂₄in supervacuis rebus noli scrutari multipliciter

et in pluribus operibus eius non eris curiosus

₂₅plurima enim super sensum hominis ostensa sunt

tibi

₂₆multos enim inplanavit

suspicio illorum

et in vanitate detinuit sensus illorum

₂₇cor durum male habebit in novissimo

et qui amat periculum in illo peribit

₂₈cor ingrediens duas vias non habebit successus

et pravicordius in illis scandalizabitur

₂₉cor nequam gravabitur doloribus

et peccator adiciet ad peccandum

₃₀synagogae superborum non est sanitas

frutex enim peccati eradicabitur in illis

et non intellegetur

₃₁cor sapiens intellegitur in sapientia

et auris bona audiet cum omni concupiscentia sapientiam

₃₂sapiens cor et intellegibile abstinebit se a peccatis

et in operibus iustitiae successus habebit

₃₃ignem ardentem extinguit aqua

et elemosyna resistit peccatis

₃₄et Deus conspector

qui reddit gratiam

meminit in posterum

et in tempore casus tui invenies firmamentum