LIBER IESU FILII SIRACH 17

₁Deus creavit de terra hominem

et secundum imaginem suam fecit illum

₂et iterum convertit illum in ipsam

et secundum se vestivit illum virtutem

₃numerum dierum et tempus dedit illi

et dedit illi potestatem eorum quae sunt super terram

₄posuit timorem illius super omnem carnem

et dominatus est bestiarum et volatilium

₅creavit ex ipso adiutorium similem ipsi

consilium et linguam et oculos

aures et cor dedit illis

excogitandi

et disciplinam intellectus replevit illos

₆creavit illis scientiam spiritus

sensum implevit cor illorum

et mala et bona ostendit illis

₇posuit oculum ipsorum super corda illorum

ostendere illis magnalia operum suorum

₈et nomen sanctificationis conlaudent

et gloriari in mirabilibus illius

et magnalia enarrent operum eius

₉addidit illis disciplinam

et legem vitae hereditavit illos

₁₀testamentum aeternum constituit cum illis

et iudicia sua ostendit illis

₁₁et magnalia honoris eius vidit oculus illorum

et honorem vocis audierunt aures illorum

et dixit illis adtendite ab omni iniquo

₁₂et mandavit illis unicuique de proximo

₁₃viae illorum coram ipso sunt semper

non sunt absconsae ab oculis ipsius

₁₄in unamquamque gentem praeposuit rectorem

₁₅et pars Dei Israhel facta est manifesta

₁₆omnia opera illorum velut sol in conspectu Dei

et oculi eius sine intermissione inspicientes in viis eorum

₁₇non sunt absconsa testamenta per iniquitatem eorum

et omnes iniquitates eorum in conspectu Dei

₁₈elemosyna viri quasi sacculum cum ipso

et gratiam hominis quasi pupillam conservabit

₁₉et postea resurget et retribuet illis

retributionem unicuique in caput illorum

et convertet in interiores partes terrae

₂₀paenitentibus autem dedit viam iustitiae

et conrogavit deficientes

sustinere

et destinavit illis sortem veritatis

₂₁convertere ad Deum et relinque peccata tua

₂₂precare ante faciem

et minue offendiculum

₂₃refer te ad Dominum

et avertere ab iniustitia

et nimis odito execrationem

₂₄et cognosce iustitias et iudicia Dei

et sta in sorte propositionis et orationis altissimi Dei

₂₅in partes vade saeculi sancti

cum vivis et dantibus confessionem

₂₆non demoreris in errore impiorum

a mortuo quasi nihil perit

₂₇confiteberis vivens vivus et sanus confiteberis et laudabis Deum

et gloriaberis in miserationibus illius

₂₈quam magna misericordia Dei

et propitiatio illius convertentibus ad se

₂₉nec enim omnia possunt esse in hominibus

quoniam non est inmortalis filius hominis

et in vanitate malitiae placuerunt

₃₀quid lucidius sole et hic deficiet

aut quid nequius excogitabit caro et

sanguis

et hoc arguitur

₃₁virtutem altitudinis caeli ipse conspicit

et omnes homines terra et cinis