LIBER IESU FILII SIRACH 16

₁et ne iucunderis in filiis impiis si multiplicentur

non oblecteris super ipsos si non est timor Dei cum

illis

₂non credas vitae illorum

et ne respexeris in labores illorum

₃melior est enim unus timens Deum quam mille filii impii

₄et utile mori sine filiis quam relinquere filios impios

₅ab uno sensato inhabitabitur patria

et a tribus impiis deseretur

₆multa talia vidit oculus meus

et fortiora horum audivit auris mea

₇in synagoga peccantium exardebit ignis

et in gente incredibili exardescit ira

₈non exoraverunt pro peccatis suis antiquis gigantibus

qui destruxerunt confidentes suae

virtuti

₉et non pepercit peregrinationi illorum

et execratus est illos prae superbia verbi illorum

₁₀non misertus est illis gentem totam perdens

et extollentes se in suis peccatis

₁₁et sicut sescenta milia peditum

qui congregati sunt in duritia cordis sui

et si unus fuisset cervicatus mirum si fuisset inmunis

₁₂misericordia enim et ira est cum illo

potens exoratio et effundens iram

₁₃secundum misericordiam suam

sic correptio illius hominem

secundum operam suam iudicat

₁₄non effugiet in rapinam peccator

et non retardabit sufferentia misericordiam

facientis

₁₅omnis misericordia faciet locum

unicuique secundum meritum operum suorum

et secundum intellectum peregrinationis ipsius

₁₆non dicas a Deo abscondar et ex summo quis mei memorabitur

₁₇in populo magno non agnoscar

quae est enim anima mea in tam inmensa creatura

₁₈ecce caelum et caeli caelorum

abyssus et universa terra et quae in eis sunt

in conspectu illius commovebuntur

₁₉montes simul et colles et fundamenta terrae

et cum conspexerit illa Deus tremore concutientur

₂₀et omne cor intellegetur

₂₁et vias illius quis intellegit

et procella quam nec oculus videbit

hominis

₂₂nam plurima opera illius sunt in absconsis

opera iustitiae quis enuntiabit

aut quis sustinebit

longe enim est testamentum a quibusdam

et interrogatio omnium in consummatione est

₂₃qui minoratur corde cogitat inania

et vir inprudens et errans cogitat stulta

₂₄audi me fili et disce disciplinam sensus

et in verbis meis adtende in corde

₂₅edicam in aequitate disciplinam

et scrutabor enarrare sapientiam

et in verbis meis adtende in corde tuo

et dico in aequitate spiritus virtutes

quas posuit Deus in opera sua ab initio

et in veritate enuntio scientiam eius

₂₆in iudicio Dei opera ipsius ab initio

et ab institutione ipsorum distinxit partes illorum

et initia ipsorum in gentibus suis

₂₇ornavit in aeternum opera illorum

nec esurierunt nec laboraverunt

et non destiterunt ab operibus suis

₂₈unusquisque proximum sibi non angustiavit

usque in aevum

₂₉non incredibiles

verbo illius

₃₀post haec Deus in terram respexit

et implevit illam bonis suis

₃₁anima omnis vitalis denudavit

ante faciem ipsius

et ipsa iterum reversio illorum