LIBER IESU FILII SIRACH 15

₁qui timet Deum faciet illud

et qui continens est iustitiae adprehendet illam

₂et obviabit illi quasi mater honorificata

et quasi mulier a virginitate suscipiet illum

₃cibabit illum panem vitae et intellectus

et aqua sapientiae salutaris potabit illum

et firmabitur in illo et non flectetur

₄et continebit illum et non confundetur

et inaltabit illum apud proximos suos

₅et in medio ecclesiae aperiet os illius

adimplebit illum spiritu sapientiae et

intellectus

et stolam gloriae vestiet illum

₆iucunditatem et exultationem thesaurizabit super illum

et nomine aeterno hereditabit illum

₇homines stulti non adprehendent illam

et homines sensati obviabunt illi

homines stulti non videbunt illam

longe enim abest a superbia et dolo

₈viri mendaces non erunt illius memores

et viri veraces inveniuntur in illa

et successum habebunt usque ad inspectionem Dei

₉non est speciosa laus in ore peccatoris

₁₀quoniam a Deo profecta est sapientia

sapientiae enim Dei adstabit laus

et in ore fideli abundabit et Dominator dabit eam illi

₁₁non dixeris per Deum abest quae odit enim ne feceris

₁₂non dicas ille me inplanavit

non enim necessarii sunt illi homines impii

₁₃omne execramentum erroris odit Deus

et non erit amabile timentibus illum

₁₄Deus ab initio constituit hominem

et reliquit illum in manu consilii sui

₁₅adiecit mandata et praecepta sua

₁₆si volueris mandata conservabunt te

et in perpetuum fidem placitam facere

₁₇adposuit tibi aquam et ignem

ad quod voles porrige manum tuam

₁₈ante hominem vita et mors bonum et malum

quod placuerit ei dabitur illi

₁₉quoniam multa sapientia Dei et fortis in potentia

videns omnes sine intermissione

₂₀oculi Dei ad timentes eum

et ipse agnoscit omnem operam hominis

₂₁nemini mandavit impie agere et nemini dedit spatium peccandi

₂₂non enim concupiscit multitudinem filiorum infidelium et inutilium