LIBER IESU FILII SIRACH 14

₁beatus vir qui non est lapsus verbo ex ore suo

et non est stimulatus in tristitia delicti

₂felix qui non habuit animi sui tristitiam

et non excidit ab spe sua

₃viro cupido et tenaci sine ratione est substantia

et homini livido ad quid aurum

₄qui acervat ex animo suo iniuste aliis

congregat

et in bonis illius alius luxuriabitur

₅qui sibi nequa est cui alii bonus erit

et non iucundabitur in bonis suis

₆qui sibi invidet nihil est illo nequius

et haec redditio est malitiae illius

₇et si bene fecerit ignoranter et non volens

facit

et in novissimo manifestat malitiam suam

₈nequa est oculus lividi

et avertens faciem et despiciens animam suam

₉insatiabilis oculus cupidi in parte iniquitatis

non satiabitur donec consummet

arefaciens animam suam

₁₀oculus malus ad mala et non satiabitur pane

et in tristitia

erit super mensam suam

₁₁fili si habes benefac tecum

et Deo bonas oblationes offer

₁₂memor esto quoniam mors non tardat

et testamentum inferorum quia demonstratum est tibi

testamentum enim huius mundi morte morietur

₁₃ante mortem benefac amico tuo

et secundum vires tuas exporrigens da pauperi

₁₄non defrauderis a die bono

et particula boni doni non te praetereat

₁₅nonne aliis relinques dolores et labores tuos

in divisione sortis

₁₆da et accipe et iustifica animam tuam

₁₇ante obitum tuum operare iustitiam

quoniam non est apud inferos invenire cibum

₁₈omnis caro sicut faenum veterescit

et sicut folium fructificans in arbore viridi

₁₉alia generat et alia deicit

sic generatio carnis et sanguinis alia finitur et alia nascitur

₂₀omne opus corruptibile in fine deficiet

et qui illud operatur ibit cum ipso

₂₁et omne opus electum iustificabitur

et qui operatur illud honorabitur in illo

₂₂beatus vir qui in sapientia sua morietur

et qui in iustitia sua meditabitur

et in sensu cogitabit circumspectionem Dei

₂₃qui excogitat vias illius in suo corde

et in absconsis illius intellegens

vadens post illam quasi vestigator

et in viis illius consistens

₂₄qui respicit per fenestras

et in ianuas illius audiens

₂₅qui requiescit iuxta domum illius

et in parietibus illius figens palum

statuet casulam suam ad manus illius

et requiescunt in casula eius

bona per aevum

₂₆statuet filios suos sub tegimen illius

et sub ramis illius morabitur

₂₇protegetur in subtegmine illius a fervore

et in gloria eius requiescet