LIBER IESU FILII SIRACH 13

₁qui tetigerit picem inquinabitur ab illa

et qui communicaverit superbo

inducet superbiam

₂pondus super se tollit qui honestiori

communicat

et ditiori te ne socius fueris

₃quid communicabit caccabus ad ollam

quando enim conliserint confringetur

₄dives iniuste egit et fremebit

pauper autem laesus tacebit

₅si largitus fueris adsumet te

et si non habueris derelinquet te

₆si habes convivet tecum et evacuabit te

et ipse non dolebit super te

₇si necessarius illi fueris subplantabit te

et subridens spem dabit narrans tibi bona

et dicet quid opus est tibi

₈et confundet te in cibis suis donec te exinaniat bis et ter

et in novissimo derideat te

postea videns derelinquet te

et caput suum movebit ad te

₁₀adtende ne seductus in stultitiam humilieris

₁₁noli esse humilis in sapientia tua

ne humiliatus in stultitiam seducaris

₁₂advocatus a potentiore discede

ex hoc enim magis te advocabit

₁₃ne inprobus sis ne inpingaris

et longe abesto ne eas in oblivionem

₁₄ne retineas ex aequo loqui cum illo

ne credas multis verbis illius

ex multa enim loquella temptabit te

et subridens interrogabit te

de absconditis tuis

₁₅inmitis animus

illius conservabit verba tua

et non parcet de malitia et de vinculis

₁₆cave tibi et adtende diligenter auditui tuo

quoniam cum subversione tua ambulas

₁₇audiens vero illa quasi in somnis vide

et vigilabis

₁₈omni vita tua

dilige Deum et invoca eum in salute tua

₁₉omne animal diligit similem sibi

sic et omnis homo proximum sibi

₂₀omnis caro ad similem sibi coniungitur

et omnis homo simili sui sociabitur

₂₁si communicabit lupus agno aliquando sic peccator iusto

₂₂quae communicatio sancto homini ad canem

aut quae pax bona diviti ad pauperem

₂₃venatio leonis onager in heremo

sic pascua sunt divitum pauperes

₂₄et sicut abominatio est superbo humilitas

sic execratio divitis pauper

₂₅dives commotus confirmatur ab amicis

humilis autem cum ceciderit expellitur et a notis

₂₆diviti decepto multi recuperatores

locutus est superba et iustificaverunt illum

₂₇humilis deceptus est et insuper arguitur

locutus est sensate et non est datus ei locus

₂₈dives locutus est et omnes tacuerunt

et verbum illius usque ad nubes perducent

₂₉pauper locutus est et dicunt quis est hic

et si offenderit subvertunt illum

₃₀bona est substantia cui non est peccatum in conscientia

et nequissima paupertas in ore impii

₃₁cor hominis inmutat faciem illius sive in bona sive in mala

₃₂vestigium cordis boni et faciem bonam

difficile invenies et cum labore