PSALMI IUXTA HEBR. 88

₁eruditionis Aethan Ezraitae

₂misericordias Domini in aeternum cantabo

in generatione et generatione adnuntiabo

veritatem tuam in ore meo

₃quia dixisti sempiterna misericordia aedificabitur

caelos fundabis et veritas tua in eis

₄percussi foedus cum electo meo iuravi David servo meo

₅usque in aeternum stabiliam semen tuum

et aedificabo in generationem et generationem

thronum tuum semper

₆confitebuntur caeli mirabilia tua Domine

et veritatem tuam in ecclesia sanctorum

₇quis enim in nubibus adaequabitur Domino

adsimilabitur Domino de filiis Dei

₈Deus inclitus in arcano sanctorum nimio

et terribilis in cunctis qui circum eum sunt

₉Domine Deus exercituum quis similis tui

fortissime Domine et veritas tua in circuitu tuo

₁₀tu dominaris superbiae maris

et elationes gurgitum eius tu conprimis

₁₁tu confregisti quasi vulneratum superbum

in brachio forti tuo dispersisti inimicos tuos

₁₂tui sunt caeli et tua est terra

orbem et plenitudinem eius tu fundasti

₁₃aquilonem et dexteram tu creasti

Thabor et Hermon nomen tuum laudabunt

₁₄tuum brachium cum fortitudine

roboretur manus tua exaltetur dextera tua

₁₅iustitia et iudicium firmamentum throni tui

misericordia et veritas praecedent faciem tuam

₁₆beatus populus qui novit iubilum

Domine in lumine vultus tui ambulabunt

₁₇in nomine tuo exultabunt tota die

et in iustitia tua exaltabuntur

₁₈quia gloria fortitudinis eorum tu es

et in misericordia tua elevabis cornu nostrum

₁₉quia a Domino est protectio nostra

et a Sancto Israhel rege nostro

₂₀tunc locutus es per visionem sanctis tuis et dixisti

posui adiutorium super robustum

exaltavi electum de populo

₂₁inveni David servum meum oleo sancto meo unxi eum

₂₂cum quo manus mea firma erit

et brachium meum roborabit eum

₂₃non decipiet inimicus eum et filius iniquitatis non adfliget eum

₂₄sed concidam ante faciem eius hostes illius

et qui eum oderunt percutiam

₂₅veritas autem mea et misericordia mea erit cum eo

et in nomine meo exaltabitur cornu eius

₂₆et ponam in mari manum eius et in fluminibus dexteram eius

₂₇ipse vocabit me pater meus

es tu

Deus meus et fortitudo salutis meae

₂₈ego autem primogenitum ponam eum excelsum regibus terrae

₂₉in aeternum custodiam ei misericordiam meam

et pactum meum fidele ei erit

₃₀et ponam perpetuum semen eius et thronum eius sicut dies caeli

₃₁si autem dereliquerint filii eius legem meam

et in iudiciis meis non ambulaverint

₃₂si caerimonias meas profanaverint

et praecepta mea non custodierint

₃₃visitabo in virga scelera eorum et in plagis iniquitatem eorum

₃₄misericordiam autem meam non auferam ab eo

nec mentiar in veritate mea

₃₅non violabo pactum meum

et quod egressum est de labiis meis non mutabo

₃₆semel iuravi in sancto meo ne David mentiar

₃₇semen eius in sempiternum erit

₃₈et thronus eius sicut sol in conspectu meo

sicut luna stabilietur in sempiternum

et testis in caelo fidelis semper

₃₉tu autem reppulisti et proiecisti

iratus es adversum christum tuum

₄₀adtenuasti pactum servi tui

profanasti in terra diadema eius

₄₁dissipasti omnes macerias eius posuisti munitiones eius pavorem

₄₂diripuerunt eum omnes qui transeunt per viam

factus est obprobrium vicinis suis

₄₃elevasti dexteram hostium eius laetificasti omnes inimicos illius

₄₄avertisti robur gladii eius et non sublevasti eum in proelio

₄₅quiescere fecisti munditiam eius

et thronum illius in terram detraxisti

₄₆adbreviasti dies adulescentiae eius

operuisti eum ignominia sempiterna

₄₇usquequo Domine absconderis in finem

succendetur quasi ignis indignatio tua

₄₈memento mei de profundo

alioquin quare frustra creasti filios hominum

₄₉quis est vir qui vivat et non videat mortem

salvans animam suam de manu inferi semper

₅₀ubi sunt misericordiae tuae antiquae Domine

quas iurasti David in veritate tua

₅₁recordare Domine obprobrii servorum tuorum

quia portavi in sinu meo omnes iniquitates populorum

₅₂quas exprobraverunt inimici tui Domine

quibus exprobraverunt vestigia christi tui

₅₃benedictus Dominus in sempiternum amen et amen