PSALMI IUXTA HEBR. 84

₁victori filiorum Core canticum

₂placatus es Domine terrae tuae reduxisti captivitatem Iacob

₃dimisisti iniquitatem populo tuo

operuisti omnes iniquitates eorum semper

₄continuisti omnem indignationem tuam

conversus es ab ira furoris tui

₅converte nos Deus Iesus noster et solve iram tuam adversum nos

₆noli in aeternum irasci nobis

extendens iram tuam in generationem et

generationem

₇nonne tu revertens vivificabis nos et populus tuus laetabitur in te

₈ostende nobis Domine misericordiam tuam

et salutare tuum da nobis

₉audiam quid loquatur Dominus Deus

loquetur enim pacem ad populum suum et ad sanctos suos

ut non convertantur ad stultitiam

₁₀verumtamen prope est his qui timent eum salutare eius

ut habitet gloria in terra nostra

₁₁misericordia et veritas occurrerunt iustitia et pax deosculatae sunt

₁₂veritas de terra orta est et iustitia de caelo prospexit

₁₃sed et Dominus dabit bonum et terra nostra dabit germen suum

₁₄iustitia ante eum ibit et ponet in via gressus suos